Kinalikaguman ti Korte Suprema (SC) iti Kamara, Senado, ken Office of the Executive Secretary (OES) nga idatagda dagiti orihinal a kopia ti 2025 General Appropriations Bill (GAB) ken ti 2025 General Appropriations Enrolled Bill (GAEB) iti di naladladaw ngem alas dose iti Lunes, Peb. 24.
Daytoy ti pammilin nga inyetnag ti SC bayat ti full court session a naangay idi Peb. 18, a nangbilin kadagiti daulo ti tallo a respondent a mangipaay iti komentoda mainaig iti petision a nangkuestionar iti konstitusionalidad ti Republic Act No. 12116, wenno ti 2025 General Appropriations Act (GAA), iti uneg ti 10 nga aldaw.
Inkeddeng ti SC a maaramid ti oral argument iti nasao a petision inton Abril 1 iti Baguio City a pakaangayan ti tradisional a summer session ti Kangatuan a Pangukoman.
Ngem sakbay daytoy, kinuna ti SC a maaramid ti preliminary conference kas panagsagana iti oral arguments, iti session hall ti SC inton Peb. 28.
Panagangkat iti 25,000 a tonelada nga ikan, inaprobaran ti DA
Iti maaramid a komperensia, dua laeng nga abogado ti agsinnumbangir a partido ti mapalubosan a mangilawlawag kadagiti bambanaga a masapul a risuten kas iti legal a kasasaad dagiti nangipila iti petision, no pudno nga adda legal a pagsusupiatan iti isyu a nadakamat iti petision, ken no umisu ti direkta a panagturong dagiti nangidatag iti petision iti SC.
Dagitoy ti risuten ti SC iti maaramid nga oral argument:
1. No linabsing met laeng ti RA 12116 (General Appropriations Act 2025) ti Section 15, Article 11 ti Konstitusion mainaig iti Sections 10 agingga iti 11 ken 37 ti RA 11223 (ti Universal Health Care Act).
2. No linabsing met laeng ti 2025 GAA, a nangikadakkel iti badiet ti Senado ken ti Kamara, iti Seksion 25 (1), Artikulo VI ti Konstitusion a mangipaay ti pannakaipangato iti pondo nga inrekomendar ti Presidente babaen ti National Expenditure Program.
3. No salungasingen met laeng ti 2025 GAA ti Section 5 (5), Article XIV ti Konstitusion nga agkunkuna a ti kangatuan a prioridad iti badiet ket maited iti edukasion.
4. No salungasingen met laeng ti 2025 GAA ti Section 27, Artikulo VI ti Konstitusion ti inaramid dagiti kameng ti Bicameral Conference Committee - a nabukel tapno mapagtutunos dagiti agsupadi a probision iti bersion ti Kamara ken ti bersion ti Senado iti General Appropriations Bill (GAB) - a nangipatulod iti Report iti GAB nga addaan kadagiti blanko a paset. (Rey G. Panaligan/Manila Bulletin//Lito Hilidon/Bannawag)
