Indauluan ni Senador Mark Villar, Chairperson ti Senate Committee on Games and Amusements, ti maikadua a public hearing iti direktiba ti presidente a pannakaiparit ti Philippine Offshore Gaming Operations wenno POGO.
Maipalagip a bayat ti naudi nga State of the Nation Address (SONA), imbilin ni Presidente Bongbong Marcos ti pannakaiserra, pannakaiparit, ken pannakaisardeng ti operasion dagiti amin a POGO iti pagilian agingga iti Disiembre 31, 2024. Kalpasan dayta, nangipila ni Senador Mark Villar iti Senado iti resolusion para iti pannakaimbestigar ti pannakaipatungpal ti direktiba ti Presidente. Naaramid ti damo a hearing makalawas kalpasanna.
Manipud naisayangkat dayta a public hearing, adu dagiti napasamak iti panangipatungpal ti gobierno iti pannakapasardeng ti POGO. Sinukimat ni Senador Mark ti sumagmamano kadagitoy, kangrunaan ti agtultuloy a kaadda dagiti POGO iti laksid a nagpason ti deadline ken ti mabalin a makagapu iti panagpaut dagitoy.
Dinakamatna ni Villar ti resulta ti kallabes nga operasion ti PAOCC, a mangisingsingasing iti sabali pay nga anggulo ti isyu. “Itay napan a Pebrero 4, adda naapasamak a joint entrapment operation ti PAOCC iti travel agency a nangy-issue kadagiti peke a papeles kadagiti ganggannaet. Sumagmamano kadagiti kabaelanda a yaramidan iti peke ti marriage certificate, birth certificate, ken passport dagiti foreign national nga agus-usar iti nagan a Filipino,” kinunana.
Panagangkat iti 25,000 a tonelada nga ikan, inaprobaran ti DA
Naibatad iti public hearing a sumagmamano a ganggannaet a trabahador ti POGO ti nakaala kadagiti kasla pudpudno ngem peke a papeles babaen ti tulong dagiti travel ken visa consultancy agency. Imparipirip ti senador ti posibilidad nga adda mapaspasamak nga inside job kadagiti ahensia ti gobierno ta agparparang nga adda koneksion dagitoy a travel agency kadagiti ahensia ti gobierno a pakaalaan kadagitoy a papeles.
“Masapul a kitaentayo ti anggulo nga adda inside job. Mabalin a daytoy ti makaigapu iti agtultuloy nga iseserrek iti Filipinas dagiti ganggannaet nga agus-usar iti peke a papeles,” kinunana.
“Dakami, ken ti PAOCC, mamatikami a daytoy ti ‘missing link’ iti imbestigasiontayo kontra iti POGO. Adda la ketdi koneksion dagitoy nga illegal agency a mangmangted iti peke a papeles kadagiti nagduduma nga ahensia ti gobierno nga agyis-issue kadagitoy a papeles. Saan nga adayo nga adda kakomplotda tapno makay-issue-da iti peke a papeles kadagiti ganggannaet. Daytoy a natakuatantayo ti mangipakita nga apagkaramut pay laeng iti rabaw daytoy isyu ti POGO ti naaramidantayo.”
Impaganetget met ni Villar ti negatibo a naipaay ti POGO kadagiti Filipino.
“Iti kaadu dagiti nagruar nga isyu, mamatikami a dakdakkel ti pukawtayo iti kaadda ti POGO ngem ti ninamnamatayo a ganaren iti benneg ti ekonomia. Iti kaadu dagiti report maipanggep iti human trafficking, scam, ken panagabuso maigapu iti kaadda dagiti POGO, saan a mabalin nga agtutugawtayo lattan idinto nga agtultuloy ti operasionda iti pagiliantayo. Saan a makaanay ti maipagarup a kontribusionda iti ekonomia a manglitup kadagiti negatibo nga epekto daytoy kadagiti kailiantayo. Masapul a maipasardengtayon a mamimpinsan ti POGO iti kasapaan a panawen ket maimbestigaran metten dagiti tumultulong kadakuada kadagiti ilegal nga aramidda.”
Mapagsasaritanto kadagiti sumarsaruno a public hearing, iti kaadda dagiti maseknan nga ahensia, dagiti update iti pannakaipakat dagiti addang iti pannakapasardeng ti POGO agraman ti pannakaideportar dagiti ganggannaet a trabahador daytoy ken ti pannakaipataw met ti umasping a dusa kadagiti Filipino a trabahador a mapapati a nakaaramid iti maipada a krimen.
