Binilin ni baro a Sekretario ti Department of Transportation (DOTr) Vince Dizon ti Toll Regulatory Board (TRB) a lapdanda ti pannakaipatungpal iti cashless toll collection kadagiti dadakkel nga expressway, gapu iti nagbalin a parikut iti napalabas ken epekto daytoy kadagiti nababbaba ti matgedanna a motorista.
Naituding a marugian a maipakat ti cashless a pannakakolektar ti toll inton Marso 15.
Iti maysa a press briefing itay Peb. 21, dinakamat ni Dizon dagiti parikut idi damo a maipatungpal ti cashless system kadagiti expressway ti pagilian, kangrunaan iti North ken South Luzon Expressways (NLEX ken SLEX).
Impalagip ni Dizon nga idi damo a naipatungpal ti cashless system, napasamak ti nakaro a trapik iti Balintawak ken iti NLEX ken SLEX gapu iti saan a naan-anay ti pannakaiwaragawag ti impormasion maipapan iti implementasion ti cashless system.
Panagangkat iti 25,000 a tonelada nga ikan, inaprobaran ti DA
Pinakaammuanen ni Dizon dagiti toll operator a dida ituloy nga ipatungpal ti cashless system inton Marso 15.
Impaganetget ni Dizon a masapul nga adalen pay nga umuna ti Metro Pacific Tollways Corporation (MPTC) ken ti San Miguel Corporation (SMC) ti agdama a sistema sakbay nga ipatungpalda ti cashless toll collection.
Kinuna ni Dizon a masapul a kitaen dagiti toll operator no nasayaat met laeng ti panagandar ti pasilidad, no naannayas met laeng ti panagandar dagiti barrier iti toll plaza, ken no mabasa met la a nasayaat dagiti RFID sticker kadagiti lugan. Innayonna nga agingga a di marisut dagitoy a parikut, saan pay a panawen a maipatungpal ti cashless system.
Iti sabali a bangir, kinuna ni Dizon a saan a pabor kadagiti marigrigat a motorista ti cashless system ta saanda a kabaelan ti ag-load iti ₱2,000, ₱3,000, wenno ₱5,000 iti Easytrip, malaksid pay iti panagbayadda iti multa a ₱1,000 (umuna a pananglabsing), ₱2,000 (maikadua a panaglabsing), ken ₱5,000 (sumarsaruno a panaglabsing), no insufficient fund ti RFID-da.
Impaganetget ni Dizon ti kapateg ti pannakatimbeng ti regulasion ken pagnam-ayan ti publiko, ken masapul a dagiti polisia ti gobierno ti mangpalag-an, saan a nakarkaro a mangparigat, iti biag dagiti umili. (Argyll Cyrus Geducos/Manila Bulletin//Lito Hilidon/Bannawag)
