Pinirmaanen ni Presidente Ferdinand Marcos Jr. ti Republic Act (RA) No. 12123, a nangbaliw iti umuna a regular nga eleksion iti Bangsamoro Autonomous Region idiay Muslim Mindanao (BARMM), kas kinompirmar ni Executive Secretary Lucas Bersamin.
Maibatay iti linteg a napirmaan idi Pebrero 19, naikeddeng a maaramid ti umuna nga eleksion iti BARMM inton Oktubre 13, 2025, sa maigiddan iti national elections inton 2028, ken iti tunggal tallo a tawen kalpasanna.
Ti Commission on Elections (Comelec), iti babaen ti Bangsamoro Electoral Office, ti napusgan a mangipaulog kadagiti alagaden ti eleksion ken pannakaipatungpal dagitoy.
Segun iti linteg, inton Oktubre 30 nga agakem dagiti opisial a mangabak iti eleksion a maangay inton Oktubre 2025.
Panagangkat iti 25,000 a tonelada nga ikan, inaprobaran ti DA
Automatiko a maibilang a kandidato para iti eleksion inton Oktubre 2025 dagiti nangipila iti certificates of candidacy para iti parliamentary seat iti BARMM. Saan a mapalubosan ti baro a panangipila ken panagbaliw ti nominasion, malaksid no matay wenno madiskualipikar ti kandidato.
Bayat a maur-uray ti eleksion, ti Bangsamoro Transition Authority (BTA) ti agtultuloy a kas ad interim a turay ti BARMM. Agtalinaed dagiti kameng ti BTA iti akemda agingga a sukatan ida ti Presidente wenno mapaababa ti terminoda gapu iti panagakemda iti sabali a posision. (Argyll Cyrus Geducos/Manila Bulletin//Lito Hilidon/Bannawag)
