Kas paset ti natibtibker a pananglaban ti administrasion kontra kadagiti palso a damag, kinuestionar ti maysa nga opisial ti Malacañang no ti kaudian nga alegasion ni dati a presidente Rodrigo Duterte kontra ken ni Presidente Marcos ket maysa laeng kadagiti joke-na.
Daytoy ti kinuna ni Communications Undersecretary Claire Castro kalpasan nga inakusaran ni Duterte a nagtakaw ken nagilako ni Marcos iti gold reserves ti pagilian.
Iti maysa a pannakiuman kadagiti agiwarwarnak iti Malakanyang idi Pebrero 24, kinuna ni Castro nga adu unay dagiti angaw ni Duterte ket mabalin a maysa laeng kadagitoy ti alegasionna maipapan iti balitok.
"Saantayo pay la kadi a nairuam kenkuana a kas iti inkarina idi nga ag-jetski (a mapan mangabog kadagiti Intsik iti West Philippine Sea) ket idi pinatpatitayo met, inawagannatayo nga estupido ta apay a namatitayo kenkuana?" innayonna.
Sara Duterte, agsagsaganan nga agawid iti pagilian
Ngem kinuna ni Castro a serioso ti Malakanyang iti alegasion ni Duterte
Kinarit ni Castro ni Duterte a mangiparang daytoy iti pammaneknek a natagamtam ni Marcos dagiti reserba a balitok ti pagilian.
"Awanan kadi isuna kagiti economic experts a mangbagbaga kenkuana maipapan kadagiti regular nga aktibidad ti BSP? Masdaawkami ta apay a kasla awan ammo ti dati a presidente iti maipapan (iti gold reserves)," kinuna ni Castro.
Iti maysa a statement, kinuna ti Bangko Sentral ng Pilipinas (BSP) a ti gross international reserves (GIR) ti pagilian, a pakairamanan ti balitok, ket ti laeng BSP ti akin-iggem ken mangtartarawidwid tapno mataginayon ti international stability ken convertibility ti Philippine peso tapno matungpal ti ania man a foreseeable net demands ti BSP para kadagiti foreign currencies.
"Saan a maar-aramat ti GIR ti pagilian para iti sabali a panggep malaksid iti panangtungpal kadagiti forex requirements ti pagilian," kinunana ti BSP.
Addaan annongen a mangimaton kadagiti external accounts ti pagilian, malaksid iti dadduma pay a functions, kinuna ti BSP a gumatgatang ken aglaklakoda iti balitok iti panaglabas dagiti tawen kas paset dagiti kangrunaan a functions-na.
"No aglako ti BSP iti balitok, agsubli ti maganarna ken agtalinaed iti GIR. Idi napan a tawen, ngimmato ti GIR iti $106.3 a bilion manipud iti $103.8 bilion idi 2023," kinuna pay ti BSP.
Segun iti BSP, manmantenirenna ti maysa a portion ti reserbana iti balitok kas paset ti GIR ti pagilian a kaaduanna tapno masalakniban wenno ma-offset ti panaggaraw ti presio iti merkado dagiti dadduma nga assets.
Nupay kasta, inlawlawag ti BSP a gapu ta agballiwbaliw ti presio ti balitok, bassit ti maganarna nga interest, ken magastos iti panagilebben, saan a kayat dagiti banko sentral ti agikut iti adu unay a balitok. (Argyll Cyrus Geducos/MB)
