Iwayat ti Philippine Army (PA) ken Philippine Navy (PN) ti pannakaimbestigar ti maipagarup a cyberattack iti bukodda a network, segun kadagiti opisial idi rabii ti Lunes, Pebrero 24, ngem kinunada a saan a pudno ti alegasion nga adda nasurok a 300 a gigabytes (GB) a datos ti militar ti naibutaktak.
Maibatay iti naikkaten a paskil iti social media, inaklon ti grupo a “Philippine Exodus Security” nga isuda ti akin-aramid iti maipagarup a pannakaraut iti datos iti sistema ti Army ken Navy.
Segun ken ni Col. Louie Dema-ala, pannakangiwat ti PA, naduktalanda ti ilegal pananggandat ti maysa a grupo a mangserrek iti network ti PA, ket isaysayangkatdan dagiti pamuspusan a pangdepensa tapno maliklikan dagiti kastoy a pasamak iti masanguanan.
Ngem kinuna ni Dema-ala nga awan ti nakompromiso a datos, ta maysa laeng a panangpadas ti napasamak, ken maiduma daytoy iti hacking.
Polis a wanted iti panagrames, natiliw kalpasan ti ilalasatna iti EDSA busway
Iti sabali a bangir, kinuna ni Capt. John Percie Alcos, pannakangiwat ti PN, nga im-imbestigarenda ti maipagarup a data breach ket impakatdan dagiti kasapulan tapno masigurado ti kinatalged ti sistemada.
Gandat ti Armed Forces of the Philippines (AFP) a pabilgen ti kabaelanda mainaig iti cybersecurity gapu iti panagadu ti insidente ti cyberattack kadagiti napalabas a tawtawen.
Segun iti AFP, di nababbaba ngem iti 1,000 a cyberattack ti sangsanguenda iti tunggal aldaw. (Martin Sadongdong/Manila Bulletin//Lito Hilidon/Bannawag)
