Iti maysa a dramatiko a panagbalbaliw ti relasion ti Estados Unidos iti liderato ni Presidente Donald Trump kadagiti pagilian iti ballasiw ti Atlantic, nakisina daytoy kadagiti kaaliadona iti Europa babaen ti panagkedkedna a mangpabasol iti Russia iti panangraut daytoy iti Ukraine, babaen kadagiti botos iti tallo a resolusion ti United Nations, a napagbobotosan ita a Pebrero 25, nga agpanggep a mangigibusen iti tallo a tawenen a gubat.
Kimmaro ti giwang iti nagbabaetan dagiti maseknan a nasion kalpasan a nagdesision ni Trump a direkta a makipatang iti Russia itay lawasna maipapan iti panangigibus iti gubat, a nakaupayan ti Ukraine ken dagiti taga-Europa a mangsupsuportar itoy ta nailaksidda iti nasao a panagpapatang..
Iti naangay a General Assembly ti U.N., nakikadua ti U.S. iti Russia a nagbotos kontra iti resolusion ti Ukraine a suportado ti Europa a mangiwarwaragawag iti agresion ti Moscow ken mangikalkalikagum iti madagdagus a panagtalaw dagiti tropa ti Russia iti Ukraine.
Nag-abstain ti U.S. a nagbotos iti maysa pay a resolusion kalpasan a binaliwan dagiti taga-Europa, nga indauluan ti France, tapno maiparangarang a nalawag a ti Russia ti nagraut. Naisayangkat ti panagbobotos iti maikatlo nga anibersario ti panangraut ti Russia.
Pannakaiserra ti Departamento ti Edukasion ti U.S., imbilin ni Trump
Binotosan ti General Assembly iti 93-18, a 65 ti nag-abstain, ti pannakaaprobar ti resolusion ti Ukraine. Impakita ti resulta a bimmassit a suporta iti Ukraine no idilig iti napalpalabas a panagbobotos ti asemblea, a nasurok a 140 a nasion ti nangkondenar iti agresion ti Russia ken nagkiddaw iti madagdagus nga ipapanaw dagiti tropa ti Russia.
Insaruno ti asemblea a tinaming t resolusion nga inaramid ti U.S., nga idinto a mangbigbigbig iti “nakalkaldaang a pannakapukaw ti biag a ginubuay ti dangadang ti Russia ken Ukraine” ken “indawatna ti nadaras a pannakaigibus ti panagdadangadang ken indagadagna ti manayon a kappia iti nagbaetan ti Ukraine ken Russia,” ngem pulos a dina dinakamat ti agresion ti Moscow.
Iti maysa a sorpresa a tignay, nangisingasing ti France iti tallo a pannaamendar, a nanginayon a ti gubat ket resulta ti “naan-anay a panangraut ti Russian Federation iti Ukraine.” Pinasingkedan dagiti pannakaamendar ti panagkumit ti asemblea iti soberania, wayawaya, panagkaykaysa ken teritorial nga integridad ti Ukraine, ken agkidkiddaw iti kappia a mangraem iti U.N. Charter.
Insingasing ti Russia ti maysa a pannakaamendar a mangkidkiddaw a mataming dagiti “root causes” ti panagdadangadang.
Naaprobaran amin dagiti pannakaamendar ket naipasa ti resolusion iti 93-8 a botos ken 73 a panag-abstain. Nagbotos ti Ukraine iti “wen,” nag-abstain ti U.S., ken nagbotos ti Russia iti “saan.”
Sinuportaran dagiti kaaliado ti U.S. iti Asia dagiti resolusion, a pakairamanan ti Japan, South Korea, Australia, ken New Zealand; kasta met ti Canada ken Mexico ken dagiti pagilian iti Europa, malaksid ti Hungary.
Imparangarang dagiti agsusupanget a resolusion dagiti tension a rimsua iti nagbaetan ti U.S. ken Ukraine. Iti kumarkaro a panagsisinnukat iti retorika, inawagan ni Trump ni Ukrainian President Volodymyr Zelenskyy a “diktador” gapu iti saan a panangangay daytoy iti eleksion kabayatan ti gubat, idi kaaduan a paset ti Ukraine ket sinakup ti Russia, a dagiti soldado ti Ukraine ket adda iti frontlines ken adda iti babaen ti martial law ti pagilian.
PInapalso nga inakusaran ni Trump a ti Kyiv ti nangirugi iti gubat. Sinungbatan met ni Zelenskyy nga agnanaed ni Trump iti “disinformation space” nga partuat ti Russia. (Edith M. Lederer/AP)
