Impraestruktura ken turismo ti dua a kangrunaan nga ipangruna ni Camille Villar iti tay-ak ti panagdur-as no bilang maipaayan iti gundaway nga agserbi kadagiti Filipino iti Senado iti daytoy umay nga eleksion inton Mayo, 2025.
Iti maysa nga interbiu itay nabiit iti Iloilo a nangiwayatan iti proclamation rally ti nakairamananna nga Alyansa Para sa Bagong Pilipinas a tiket ti administrasion, kuna ni Villar a napinget ti kalikagumna nga agsubli iti Iloilo ken masiguradona a sadino man ti papananna wenno ania man ti maipaay kenkuana a gasat, suportaranna ti amin a proyekto iti nasao a lugar ket makikammaysa para iti panagdur-as ti Iloilo.
Inkari pay ni Villar nga ipangrunana ti pannakapataud dagiti trabaho a mangitag-ay iti biag dagiti Filipino.
Kunana a dua ti makitkitana a maipangruna iti Iloilo. Iti tay-ak ti impraestruktura, adu dagiti nadakamat a proyekto ket tumulong kadagitoy ta nasayaat para iti ekonomia, ta ti impraestruktura, mangparnuay iti adu a trabaho. Maikadua ti turismo ta napintas dagiti buya iti Iloilo ken adu dagiti naiimas a makan iti nasao a lugar.
