Maikkan iti gundaway a mangged iti Japan dagiti Filipino a careworker ken nars kas impakaammo ti Embahada ti Japan a naluktan ti aplikasion para iti 300 a careworker ken 50 a nars.
Iti maysa nga statement ti Japanese Embassy iti Manila, "madaman ti panagrekrut para kadagiti iti sumarsaruno a batch dagiti aplikante para iti nars ken certified careworker.”
Maisayangkat daytoy iti babaen ti Japan-Philippines Economic Partnership Agreement (JPEPA).
Dagiti aplikasion para kadagiti posision ti 50 a nars ti "kangoshi" ken 300 a careworker wenno "kaigofukushishi" ket iproseso ti Department of Migrant Workers (DMW) ti Filipinas babaen ti pannakitinnulong ti Japan International Corporation of Welfare Services (JICWELS).
Sara Duterte, agsagsaganan nga agawid iti pagilian
Masapul a nagturpos iti Bachelor of Science in Nursing dagiti kualipikado a nars ken addaan iti aktibo a lisensia ti Professional Regulation Commission (PRC), kasta met a masapul nga addaan iti minimum a tallo a tawen a padas iti trabaho iti ospital, klinika, wenno health center, ken masapul a naikumit ken naregget nga agtrabaho ken agadal idiay Japan kas “kangoshi” tapno makagun-od iti National License.
Para kadagiti careworker, masapul a nagturpos iti Bachelor of Science in Nursing (addaan man wenno awanan iti lisensia ti PRC), wenno nagturpos iti uppat a tawen a kurso ngem addaan iti National Certificate II iti Caregiving (NC II) manipud iti Technical Education and Skills Development Authority (TESDA), ken masapul a naikumit ken naregget nga agtrabaho ken agadal idiay Japan a kas kandidato para iti “kaigofukushishi” tapno makagun-od iti National License.
Segun iti embahada, dagiti maawat nga aplikante ket masapul nga agsanay iti pagsasao a Japanese iti uneg ti innem a bulan ditoy Filipinas ken innem a bulan idiay Japan.
Maipaay a libre ti panagsanay agraman ti daily living allowance kabayatan ti panagsanay.
Kalpasan dayta, maikaridanton nga agobra iti tallo agingga iti uppat a tawen kadagiti ospital ken caregiving facilities iti Japan.
“Maiganetgetto met kadagiti aplikante a mangalada inton agangay iti Japanese license para iti Kangoshi ken Kaigofukushishi tapno maited kadakuada ti gundaway para iti napapaut nga employment term idiay Japan,” kinuna pay ti embahada.
Masapul nga isubmiter dagiti aplikante kadagiti regional office wenno iti central office ti DMW dagiti sumaganad a dokumento: detaliado a resume nga addaan iti nabiit pay a naala a 2x2 ID picture ken nalawag a photocopies ti transcript of records, diploma iti kolehio, na-update a Certificate of Employment, Japanese Language Training Certificate (no adda), balido a sertipiko ti TESDA (no saan a nagturpos iti BS Nursing), balido a pasaporte, balido a clearance manipud iti National Bureau of Investigation, sertipiko ti PEOS, ken naiprinta a kopia ti Workers Information Sheet/e-Registration.
Ti deadline ti panagisubmiter iti aplikasion ket inton Abril 4 para kadagiti central ken regional offices ti DMW.
Mabalin a download-en dagiti interesado nga aplikante ti dokumento iti https://dmw.gov.ph/resources/dsms/DMW/Externals/2025/RSF-250003-2025.pdf para iti ad-adu pay nga impormasion. (Raymund Antonio/MANILA BULLETIN)
