Pinasingkedan ti Philippine Army (PA) idi Martes, Pebrero 25, a nabigbigdan ti grupo a nangpadas a nangserrek kadagiti cyber system ti PA ken nagpanggep nga agala iti datos ti militar.
Saan ketdi nga innaganan ni Kor. Louie Dema-ala, pannakangiwat ti Army, ti nasao a grupo ngem kinunana a naiwayaten ti naan-anay nga imbestigasion tapno matunton dagiti kameng ti grupo ken sungbatanda dagiti illegal nga aktibidadda.
“Ti la makunami ket ammomi ti IP [internet protocol] address nga inusarda, ammomi no sadino ti yanda, ammomi no asino dagitoy a tattao,” kinuna ni Dema-ala.
Pinadas pay ti isu met la a grupo a serken ti mail system ti Philippine Navy (PN), segun ken ni pannakangwat ti Navy Captain John Percie Alcos.
Sara Duterte, agsagsaganan nga agawid iti pagilian
“Saan a maawagan daytoy kas hacking. Illegal nga intrusion daytoy iti sistematayo," kinuna ni Alcos.
“Maim-imbestigaranen daytoy tapno maammuan no kasano kasaknap ti pannakastrekda. Saanda met a nastrek ti sibubukel nga IT infrastructure ti Navy,” innayonna.
Segun iti Army ken Navy, ginandat ti nangatakar nga aksesen dagiti online system-da babaen ti panagusar daytoy iti credentials dagiti nakompromiso nga email accounts.
Iti sabali a bangir, ti makunkuna a hacking, isu ti panang-bypass iti security ken panangbalbaliw iti sistema tapno makastrek.
“Awan ti napasamak a pannaka-bypass ti security idi naisayangkat ti illegal a panag-login gapu ta nabigbigmin dagiti kredensial ti nakompromiso nga account,” kinuna ni Dema-ala.
Gapu ta dua a kangrunaan a serbisio ti nairaman iti cyber attack, ti Armed Forces of the Philippines’ (AFP) Cyber Command a mismo ti nangiwayat iti imbestigasion.
Paset ti imbestigasion ti panangammo no ti panagatakar ket maysa nga inside job wenno saan gapu ta adda dagiti nakompromiso nga email acoount, wenno adda nairaman nga impluensia ti ganggannaet.
Impasigurado ti Army ken Navy iti publiko a “natalged” pay laeng dagiti sistemada ken protektado dagiti personnel-da kasta met dagiti state secret. (Martin Sadongdong/MB)
