Kiniddaw ni Senador Mark Villar iti Department of Transportation (DOTr) ken iti Department of Public Works and Highways (DPWH) nga ipakaammoda koma no ania ti dinur-asanen ti EDSA Decongestion Master Plan, a nangigunamgunamanna no ania ti imbunga daytoy iti yaannayas ti panagbiahe dagiti lugan, iti kinanam-ay dagiti tattao iti ipapanda kadagiti nadumaduma a paset ti siudad, ken no ania ti imbungana iti isasayaat ti pamastrekan iti Metro Manila.
“Nadisenio ti EDSA Decongestion Master Plan tapno mapaannayas ti trapiko ken mangipaay iti agpaut a nanam-ay a panagbiahe a para iti minilion a Filipino. Napateg a maammuantayo no ania ti dinur-asan dagitoy a proyekto ken maammuantayo no ania ti naaramidan dagitoy iti pannakapasayaat ti biahe iti inaldaw,” kinuna ni Villar.
Buklen ti master plan dagiti kangrunaan a proyekto iti impraestruktura, a pakairamanan dagiti expressway, dagiti rangtay, ken dagiti alternatibo a ruta nga agpanggep a mangpalukay iti trapiko iti EDSA ken dadduma pay a kangrunaan a kalsada iti Metro Manila. Mairaman kadagiti flagship projects ti Skyway Stage 3, ti NLEX-SLEX Connector, ti C5 Link, ken dagiti sumagmamano a rangtay iti Karayan Pasig.
Inggunamgunam ni Senador Villar iti DOTr ken DPWH a mangidatagda iti detaliado a report a pakailanadan dagiti nalpasen a proyekto, dagiti madama a maar-aramid, ken dagiti maaramid iti masanguanan nga adda iti babaen ti plano. Impaganetgetna ti kinapateg ti pannakaipanamnama a dagitoy nga inisiatibo ken ipaayda dagiti manamnama met a benepisio a para kadagiti umili.
16 nga OFW a nagrali iti Qatar, mabalin a maibalud iti 3 a tawen
“Karbengan dagiti tattao ti maaddaan kadagiti episiente ken mapangnamnamaan nga impraestruktura. Babaen ti pannakaebaluar dagitoy a proyekto, maitudotayo dagiti mabalin pay a mapasayaat a proyekto a mangsustener iti agpaut a kinanam-ay ti panagbiahe dagiti agindeg iti Kamanilaan,” innayon ni Villar.
Impanamnama ni Villar ti panangikumitna iti bagina a mangsuportar kadagiti programa iti impraestruktura a mangtulong iti EDSA Decongestion Master Plan, tapno maipanamnama met ti kaadda ti nasamay ken nakasagana-a-para-iti-masaknayan a transport network ti pagilian.
