Impasigurado ni Sekretario ti Department of Social Welfare and Development (DSWD) Rex Gatchalian a maaddaan iti naing-inget a safety protocols ken agtalinaed a transparent ti ”Ayuda para sa Kapos ang Kita” Program (AKAP), maibasar kadagiti naisingasing a pagannurotan.

Iti interbiu kenkuana iti radio idi Pebrero 27, impaganetget ni Gatchalian ti panagtitinnulong ti DSWD, Department of Labor and Employment (DOLE), ken National Economic Development Authority (NEDA) tapno mapatibker dagiti pagannurotan ken masigurado nga adda dagiti safeguards tapno malapdan ti di umisu a pannakausar ti pondo.

Kinuna met ni kinuna ni Presidente Ferdinand Marcos Jr., iti mensahena a panang-veto kalpasan ti panagpirmana iti General Appropriations Act (GAA) ti 2025, a mabalin laeng nga ituloy ti DSWD ti pannakapakat ti AKAP kalpasan ti pannakaaprobar dagiti napabaro ken nalawag a pagannurotan a napataud babaen ti panagtitinnulong ti DOLE, NEDA, ken DSWD.

Kinuna ni Gatchalian a ti narebisar a pagannurotan ket madama a reprepasuen ti Office of the President ken Department of Budget and Management. Maaramid dagitoy tapno mapapigsa dagiti pammatalged ken malapdan ti political partisanship sakbay ti midterm elections.

Lokal

Umdas a suplay ti ikan iti Ilocos Region, impasigurado ti BFAR

Mairaman kadagiti kangrunaan a safety measures ket ti pannakaipablaak ti nagan dagiti benepisiario ken naing-inget a pannakaiparit ti pannakairaman dagiti kandidato iti politika kadagiti aktibidad ti AKAP payouts.

Segun ken ni Gatchalian, nabenepisiaran ti AKAP ti 4 million a Filipino idi 2024.

Panggep ti AKAP ti mangipaay iti pinansial a tulong kadagiti nababa ti matgedanna ken minimum-wage earners, partikular dagiti naapektaran iti implasion ken panagbaliwbaliw ti ekonomia.

Puntiriana a benepisiaran dagiti nalaka a maapektaran a sektor, agraman dagiti mannalon, mangngalap, ken dagiti trabahador manipud iti impormal nga ekonomia, tapno maksayan ti pinansial a pakadagsenanda. (Ellalyn De Vera-Ruiz/MB)