Ayat ken panagraem ti tulbek ti manayon a panagdenna dagiti agassawa, inyunay-unay ni Camille Villar kadagiti 177 a nagkasar iti naangay a mass wedding wenno kasalang bayan iti Valenzuela City kabayatan ti Love Month.
Iti panangsaksi ni Villar iti panagsisinnukat dagiti nagkallaysa iti karida iti tunggal maysa, binalakadan ida 'toy millennial senatorial candidate a taginayonenda ti ayat ken panagraem iti nagbaetanda iti panangbangonda iti pamiliada.
“Ti pamilia ti maibilang a basic unit of society ken isu ti pundasion ti kagimongan. Napateg unay ti natibker a pamilia a makaipaay iti nasayaat nga aglawlaw kadagiti annak wenno uray dagiti dadduma pay a kameng ti pamilia. Napateg unay ti panangpapigsa ken panangpatibker iti pamilia, nangruna kadagitoy a panawen,” kinuna ni Villar.
Innayonna: “Kayatko nga ipalagip kadakayo a nagkasar a saluadan ken ayatenyo dagiti assawayo ken ti agbalin a pamiliayo ta agpannuray kadakayo ti napintas ken nasayaat a masanguanan dagiti annakyo. Sapay koma ta agtultuloy ti panagiinnayan-ayat ken panagbibinnurayyo iti respeto iti tunggal maysa ta dita ti pangrugian dagiti arapaap a balonento dagiti annakyo iti masanguanan nga aldaw. Dita met a mabukel ken matungpal dagitoy nga arapaap.”
Pannakabukel ti VFA ti Filipinas ken France, inanamongan ni Marcos
Inkari ni Villar kadagiti agaassawa a mangaramid iti pamuspusan tapno maaprobaran dagiti addang a mangitandudo iti pagsayaatan ken pakaseknan ti pamilia ket masigurado a masalakniban ti interes-da.
“Mangnamnamakayo nga agnanayon a pampanunotek dagiti pagsayaatan ti tunggal pamilia a Filipino. Namnamaenyo a siak ti agserbi a baro a pannakatimekyo para iti baro a bigat para kadatayo amin,” kinuna ‘toy kandidato a senador ti Alyansa ng Bagong Pilipinas.
