Innem a tattao ti naipadamag a nasugatan iti pannakarsuod ti maysa a paset (span) ti Cabagan-Santa Maria Bridge a manglasat iti Cagayan River, iti Barangay Casibarag Norte, Cabagan, Isabela idi 8:00 ti rabii ti Huebes, Pebrero 27.
Uppat a lugan, maysa a dump truck, dua nga sports utility vehicle, ken maysa a motorsiklo, ti madama a bumalballasiw iti rangtay (nga agturong iti ili ti Santa Maria, Isabela) idi napasamak ti insidente, idi addadan iti maikatlo nga span ti rangtay.
Mapapati a ti trak ti nakaigapuan ti pannakarsuod ti nasao a paset ti rangtay ta nagkarga daytoy iti batbato a naammuan nga agdagsen iti nasurok a 100 a tonelada.
Segun iti opisial a waragawag ti Department of Public Works and Highways (DPWH) Region 2, "narsuod ti agatiddog iti 60 a metro a 3rd span (iti Cabagan Side) ti Arch Bridge ti Cabagan-Sta. Maria Bridge iti Cabagan-Sta. Maria Road, Isabela, idi limmasat ti maysa a dump truck a nagkarga iti boulders a nakarkulo nga addaan approximate gross vehicle weight (GVW) a 102 a tonelada."
Sara Duterte, agsagsaganan nga agawid iti pagilian
Segun kadagiti report dagiti nagresponde nga autoridad, saandan a nadanonan ti driver ti trak ken maysa a kaduana iti lugar ti insidente.
Naitaray met iti Milagros Albano District Hospital iti Cabagan dagiti lima a biktima a naglak-am iti minor injuries idinto a naipan iti Cagayan Valley Medical Center iti Siudad ti Tuguegarao ti maysa nga ubing a nakaro ti pannakadunorna.
Kinuna ti DPWH-Region 2 a narugian a nabangon ti rangtay idi Nobiembre 2014 ken naileppas idi Pebrero 1, 2025, a nakagastosan iti agdagup iti ₱1,225,537,087.92 (bridge and approaches). Agatiddog ti rangtay iti 990 a metro ken buklen ti 12 nga arch bridge nga addaan iti span a 60 a metro, ken 9 nga span ti pre-stressed concrete girder (PSCG) type IVB. Agatiddog met dagiti approaches iti 664.10 a metro.
Segun iti DPWH-Region 02, ti R.D. Interior, Jr. Construction ti kontraktor ti nasao a rangtay.
Impakammo met ti DPWH-Region 2, nga "agtultuloy pay laeng ti ad-adda pay pananganalisarda iti makagapu iti panagpalia (ti rangtay) ken nagkiddawen ti DPWH Region 2 kadagiti eksperto manipud iti Bureau of Design ken Bureau of Construction iti Central Office tapno mangisayangkatda iti nayon nga evaluation ken assessment."
Segun met kadagiti report, malukatan koman iti trapiko ti rangtay idi pay 2019 ngem naitantan iti sumagmamano a tawen gapu iti "depektibo a disenio a saan a maikanatad iti istruktura ti rangtay," segun iti naisayangkat a third-party audit.
Naisagana manen a maluktan koman ti rangtay a para iti light vehicles laeng idi Hunio 30, 2024 ngem saan a natuloy maigapu iti pannakaladaw ti isasangpet ti sumagmamano a construction materials nga aggapu iti ganggannaet a pagilian a mausar para iti finishing touches iti rangtay. (MANILA BULLETIN/BANNAWAG News Team)
