Nakapastrek ti probinsia ti La Union iti aganay a ₱1.06 a bilion manipud iti turismo idi 2024, tallo a porsiento a nangatngato no idilig iti ₱1.03 bilion idi 2023.
Dinayaw ni Gov. Raphaelle Veronica “Rafy” Ortega-David ti nagapuanan ti probinsia.
“Maragsakankami a makaammo nga agtultuloy ti panagayat ken panangtagiragsak dagiti patpatgenmi a bisita iti ay-ayatenmi a probinsia ti La Union, iti daytoy a naisangsangayan a panagdur-as ti napastrekmi iti turismo. Agyamankami kadagiti bisitatayo iti naynay a panangpilpilida iti probinsiami kas ipangpangrunada a papanan,” kinuna ti gobernadora.
Binigbig ti Provincial Tourism Office (PTO) ti ingangato ti revenue gapu iti immay a 539,824 a bisita, nupay dua a porsiento ti bimmabaanna no idilig iti 550,359 a bisita idi 2023.
'GUMIL Dan-ay 2: Aldaw ti Daniw Kailokuan,' angayen ti GUMIL Filipinas
“Naibasar ti datos kadagiti overnight visitor manipud iti nadumaduma nga establisimiento a pagdagusan dagiti turista iti La Union,” kinuna ni PTO OIC Julius Manabat. "Immadu dagiti napapaut ti average length of stay-da, kayatna a sawen a napapaut ti quality time a binusbosda ditoy probinsia. Makitatayo a nangatngato ti epektona iti ekonomia ita a tawen," innayon ni Manabat.
Dagiti tallo a kangrunaan a sinarungkaran dagiti overnight guest: ti ili ti San Juan nga addaan iti 211,234 a bisita; Siudad ti San Fernando, nga addaan iti 105,730; ken Bauang, nga addaan iti 105,527.
“Ti yaadu dagiti turista ket posible a resulta ti road accessibility ken popularidad ti La Union a kas weekend destination,” kinuna ni Gov. Ortega-David.
Ti bulan ti Abril ti kangatuan ti bilang dagiti simmangbay a bisita, nga addaan iti 56,194. “Awaganmi daytoy a kas summer peak. Naiwaras dagiti turistatayo kadagiti nadumaduma nga aplaya, ecotourism sites, ken dadduma pay nga ididiaya ti probinsiatayo a pagpasiaran kabayatan daytoy a panawen,” kinuna ni Manabat.
Segun iti visitor satisfaction survey a maawagan iti La Union Wonders and Adventure Visitor Experience Survey nga insayangkat ti PTO, kaaduan nga agpaspasiar iti probinsia dagiti young adult a turista nga agtrabtrabaho ken grupo nga agbibiahe tapno agpalpaliwada.
Kaaduan dagiti millennial ken Gen Z nga addaan iti average a travel expenditure a ₱10,311. Innem a pulo a porsiento ti babbai ken 40 a porsiento ti lallaki.
Siam a pulo ket tallo a porsiento ti nag-overnight stay, a dagiti budget-friendly a pagdagusan dagiti turista ti magustuanda a pagyanan. Pito a porsiento ti day tourist. Innem a pulo ket walo a porsiento ti agsublisubli a bisita nga addaan iti average a lima a panagsubli.
Uppat a pulo ket uppat a porsiento ti naggapu iti Metro Manila, a sarunuen ti Calabarzon, Cordillera Administrative Region, Central Luzon, ken Ilocos Region. Pitopulo ket dua a porsiento ti nagusar iti pribado a lugan ken 28 a porsiento ti naglugan iti para publiko a transportasion. (Freddie Lazaro/MB)
