Awan ti nabukel a katulagan maipanggep iti mineral iti nagbaetan ti Estados Unidos (US) ken Ukraine kalpasan a bimtak ti riri iti Oval Office ti White House itay Pebrero 28.
'Inungtan' ni Presidente ti US Donald Trump ti Presidente ti Ukraine Volodymyr Zelenskyy gapu iti "kaawan panagraemna" iti naangay a taripnong iti Oval Office, ket kellaat nga imbabawina ti panagpirmada iti mineral deal a segun ken ni Trump, mangitunda koma iti panagpatinggan ti gubat ti Ukraine ken Russia.
Bayat ti panangsarungkarna ken ni Trump, manamnama a pirmaan koma ni Zelenskyy ti katulagan a mangipalubos nga ad-adu ti maala ti U.S. a rare minerals ti Ukraine, sa maangay ti sangsangkamaysa a press conference-da. Ngem nawaswas dayta a plano kalpasan ti nabara a panagsinnungbat dagiti dua a lider ti pagilian a nakiramramanan pay ni Bise Presidente ti US J.D. Vance.
Saan a nalawag no ania ti mabalin a pagbanagan ti di pannakabukel ti katulagan nga impilit ni Trump a kasapulan tapno "mabayadan" ti nasurok a $180-bilion a tulong ti U.S. a naited iti Kyiv sipud idi nangrugi ti gubat gapu iti panggep a panangsakup ti Russia iti Ukraine. Saan pay a nalawag no ania ti kayat ni Trump nga aramiden ni Zelenskyy tapno maisubli ti katulagan.
Pannakaiserra ti Departamento ti Edukasion ti U.S., imbilin ni Trump
Kiniddaw dagiti kangrunaan nga adviser ni Trump iti daulo ti Ukraine a pumanawen iti White House kalpasan a binugkawan ni Trump daytoy.
Bimmara ti saritaan da Trump, Vance, ken Zelensky idi inyebkas ti presidente ti Ukraine ti panagduaduana iti pannakipaset ti Russia iti diplomasia, a nangdakamatanna kadagiti saan a panangtungpal ti Russia kadagiti karina iti adu a tawen.
Iti maysa nga interbiu kalpasan ti panagsinnungbatda ken Trump, kinuna ni Zelenskyy a saan a nasayaat ti napasamak iti biang ti dua a pagilian. Innayon ni Zelenskyy a saan a makitulag ti Ukraine iti Russia agingga nga awan ti garantia ti Russia a saanen a rumaut daytoy.
Impaskil ni Trump iti social media a saan pay a nakasagana ti Ukraine para iti kappia.
Inyebkas a dagus dagiti daulo ti Europe ti panangsuportarda iti Ukraine kalpasan ti napasamak iti Oval Office.
Insingasing ti Prime Minister ti Italy a ni Giorgia Meloni ti "immediate summit" iti nagbaetan ti U.S. ken dagiti kaaliadona iti Europa tapno mapagsasaritaan no kasano a sarangtenda dagiti parikut iti agdama, a mangrugi iti problema ti Ukraine. (Associated Press/Manila Bulletin//Lito Hilidon/Bannawag)
