Ginandat ni Harry Roque, nagpaay a pannakangiwat ni dati a presidente Rodrigo Duterte, ti aglibas a mapan idiay Estados Unidos (U.S.) ngem nalapdan daytoy iti maysa nga eropuerto idiay Japan.
Segun daytoy iti impormasion nga impalgak dagiti opisial ti Bureau of Immigration (BI) kabayatan ti pannakaituloy ti imbestigasion ti Senate subcommittee on justice maipapan iti panaglibas ni dati a Bamban, Tarlac Mayor Alice Guo ken dagiti kakabsatna manipud iti Filipinas.
“Adda impormasionmi a napan (ni Roque) idiay Japan ket agturong kano iti U.S. ngem saan a napalubosan nga agbiahe idi ag-check in," kinuna ni hepe ti BI Intelligence Division Fortunato Manahan Jr. iti subcommittee nga indauluan ni Sen. Risa Hontiveros.
“Awan panangarestar nga insayangkat dagiti polis ti Japan ken imigrasion. Kalpasan dayta, awanen ti impormasionmi,” kinuna ni Manahan.
Pannakaimbestigar kadagiti narsuod a rangtay, kiniddaw ni Sen. Pimentel
Nakaala pay ti BI iti impormasion a pimmanaw ti asawa ni Roque idiay Singapore nga agturong idiay Dubai.
“Adda met dagiti nakakita ken ni Harry Roque idiay Dubai; adda pay impormasion a pimmanawda iti siudad (Dubai) idi Disiembre. Kalpasanna dayta, ladingitenmi, awanen ti info-tayo,” innayon ni Manahan.
Sakbay daytoy, kinuna ni Hontiveros a nakaawat met ti opisinana iti impormasion a napan ni Roque idiay Shanghai, China manipud Dubai idi Disiembre 8, 2024.
Segun iti nagun-odna nga impormasion, kinuna ni Hontiveros a maysa laeng nga aldaw a nagtalinaed ni Roque idiay Shanghai, sa nagbiahe idiay Macau.
Pinasingkedan ni Manahan a nagun-odda ti isu met laeng nga impormasion ngem kinunana a napaayda a makaala iti “balido a kinapudno" a nakastrek ni Roque iti China.
Naipan ti nagan ni Roque iti immigration lookout kalpasan a nairaman iti kaso a qualified human trafficking a naipila kontra ken ni Cassandra Li Ong ken dadduma pay a high-profile suspects a nairaman iti illegal nga aktibidad ti Philippine Offshore Gaming Operators (POGO) hub a Lucky South 99 Corp. a rinaut dagiti autoridad.
Immunan nga imbaga ti BI a posible a pimmanaw ni Roque iti pagilian babaen ti illegal a wagas.
Kabayatan pay ti Senate hearing, inadmitir ti BI nga awan ti impormasionda no naideportaren iti China dagiti tallo a boss ti POGO a da Liu Xun, Kong Xian Rui, Wang Shang Li a natiliw iti Filipinas. (Hannah L. Torregoza/MB)
