Mabalin a dumanon ti heat index iti Siudad ti Dagupan, Pangasinan iti 42 degrees Celsius (°C) ita Marso 4 ken inton bigat, Marso 5, segun iti report ti Philippine Atmospheric, Geophysical and Astronomical Services Administration (PAGASA) maibasar iti dua nga aldaw a heat index forecast a nairuar idi Lunes, Marso 3.
Ibilbilang ti PAGASA dagiti heat indices iti nagbaetan ti 42°C ken 51°C a kas “danger level,” a mangipasimudaag iti nangatngato a posibilidad a mapagteng dagiti an-annayen a mainaig iti pudot kas iti cramps, panagkapsut, ken napegpeggad a pannaka-heat stroke.
Inwaragawag met dagiti lokal a gobierno ti Manila, Marikina, Valenzuela, Caloocan, Malabon, Paranaque, Las Piñas, ken Pasay ti pannakasuspenso ti face-to-face classes idi Lunes, Marso 3, gapu iti napalalo a pudot iti National Capital Region (NCR).
Impanamnama ti Malacañang iti publiko nga ipatungpalna dagiti kasapulan a panagtignay tapno maleplepan dagiti posible nga epekto ti ngumatngato a heat index iti agrikultura ken ekonomia. (MANILA BULLETIN)
