Nangipila ni Senate Minority Leader Aquilino "Koko" Pimentel III iti resolusion a mangidarirag iti maitutop a komite ti Senado a mangisayangkat iti inquiry in aid of legislation kadagiti naynay nga insidente ti pannakarsuod dagiti rangtay iti Filipinas.
Iti panangipilana iti Senate Resolution No. 1319, kinuna ni Pimentel a daytoy ket tapno maammuan no ania ti sungsungbatan dagiti amin a responsable nga opisial ti publiko, dagiti kontraktor, ken dadduma pay a partido a nairaman, ken tapno matingiting ti kinaumisu dagiti agdama nga annuroten ti impraestruktura, nga addaan iti panggep a masigurado ti kinatalged ken kinamapagtalkan dagiti estruktura ti rangtay iti entero a pagilian.
Kinunana a nakadanonen ti makapadanag a lebel ti bilang dagiti insidente ti pannakarsuod dagiti rangtay iti entero a pagilian.
"Nagresulta dagitoy kadagiti pannakatay, pannakadunor, ken dadakkel a pukaw iti ekonomia, a nanggubuay met kadagiti madagdagus a pakaseknan kadagiti pagkurangan iti inhenieria ken disenio, panagusar kadagiti substandard a material, kaawan ti umno a panangimaton, ken posible a panagkunniber kadagiti proyekto ti impraestruktura," kinuna ni Pimentel.
Harry Roque, ginandatna ti aglibas a mapan iti US
Inpila ni Pimentel ti nasao a resolusion kalpasan a narsuod ti maysa a paset ti ₱1.2-bilion ti pategna a Cabagan-Santa Maria Bridge iti Isabela idi rabii ti Huebes, Pebrero 27.
Segun iti DPWH-Region 2, narsuod ti maikatlo nga span manipud iti banda ti Cabagan nga addaan kaatiddog nga 60 a metro idi limmabas ti maysa a dump truck a nagkarga iti dadakkel a batbato a nakarkulo nga agdagsen iti 102 a tonelada.
Kinuna ti senador a binilion a pisos ti mabusbos ken adu a panawen ti nasayang iti pannakaipatakder dagitoy a rangtay, tapno laeng marsuod wenno marpuog dagitoy iti apagdarikmat, a mamagpeggad iti biag ken mangsayang iti pondo ti publiko.
"Masapul a mabangon dagiti rangtay tapno makaandur kadagiti didigra ken nadagsen a pannakausar, ngem maulit-ulit ti pannakarsuodda ket mangpataud kadagiti serioso a pakaseknan," kinunana.
"Ipasimudaag dagitoy nga insidente ti nasken a madagdagus a pannakarepaso ti panagtungpal dagiti nasional ken lokal a gobierno kasta met dagiti kontraktor kadagiti engineering standards, design feasibility, maintenance protocols, ken dagiti pannakailatang ti badiet ti impraestruktura," innayon ti senador. (Dhel Nazario/MANILA BULLETIN)
