Inwardas ni Senador Mark Villar, pangulo ti Senate Committee on Games and Amusements, ti maikadua a public hearing mainaig iti direktiba ti Presidente a mangpasardeng iti Philippine Offshore Gaming Operations wenno POGO.
Maipalagip a bayat ti naudi nga State of the Nation Address (SONA), imbilin ni Presidente Bongbong Marcos ti pannakaiserra, pannakaiparit, ken pannakaisardeng a maminpinsan dagiti operasion ti amin a POGO iti pagilian apaman a madanon ti Disiembre 31, 2024. Kalpasanna, nangipila ni Senador Mark Villar iti resolusion iti Senado a mangiwayat iti panagpalutpot iti pannakayimplementar ti bilin ti Presidente, a nakaigapuan ti umuna a bista kalpasan ti makalawas.
Manipud iti dayta nga umuna a bista iti publiko, sumagmamano ti dimmur-asan daytoy pannakayimplementar ti panangiserra ti gobierno iti POGO. Pinalutpot ni Senador Villar ti sumagmamano nga aspekto daytoy, partikular ti kaadda latta dagiti POGO iti laksid a naglabesen ti deadline ken ti posible a pakaigapuan ti naibaybayag a kaaddada.
Dinakamat ni Villar dagiti resulta dagiti nabiit pay nga operasion ti PAOCC, a nangiparipiripanna iti baro nga anggulo iti isyu. Segun kenkuana, naiwayat idi Pebrero 4 ti maysa a joint entrapment operation ti PAOCC iti travel agency a mangiyis-isyu kadagiti peke a dokumento kadagiti foreign nationals. Sumagmamano kadagiti mayar-aramidanda iti peke ket marriage certificates, birth certificates, ken pasaporte dagiti foreign nationals a nagusaranda kadagiti nagan a Filipino.
Grupo dagiti mannursuro, nagkiddaw iti pannakaipatungpal ti 'teacher-friendly' nga iskediul iti SY 2025-2026
Nalukasan bayat ti bista iti publiko a dagiti sumagmamano a ganggannaet a mangmangged iti POGO, agparparang a nakaalada kadagiti lehitimo ngem peke a dokumento babaen ti tulong dagiti ahensia iti travel ken visa consultancy agencies. Impaganetget ti senador ti posibilidad nga adda inside job wenno adda timmulong nga empleado kadagiti ahensia ti gobierno ta dagitoy a travel agencies, agparparang nga addaanda kadagiti “koneksion” manipud kadagiti ahensia ti gobierno nga agiyis-isyu kadagiti nadakamat a dokumento.
Kuna pay ni Senador Villar nga ayonanna ti pammati ti PAOCC a daytoy ti “missing link” iti imbestigasion kontra kadagiti POGO. Daytoy ngarud baro a takuat, kuna ti Senador a rabawna pay laeng ti nalukasan daytoy isyu maipapan iti POGO.
Inyunay-unay ngarud ni Senador Villar a saan a malitupan ti ania man a benepisio iti ekonomia dagiti madi nga epekto ti POGO kadagiti Filipino kas iti human trafficking, scamming, ken abuso. Saan ngarud a rebbengna a baybay-an dagitoy ketdi, kalikaguman ti Senador a masigurado a maipaserra dagiti POGO iti kabiitan a panawen ken maimbestigar dagiti tumultulong kadagiti illegal nga operasion dagitoy.
