Addan 29 a mainaig iti eleksion nga insidente ti kinariribuk sipud nangrugi ti panagipila iti certificate of candidacy para iti midterm elections inton Mayo 12, segun ken ni daulo ti Commission on Elections (COMELEC) George Erwin Garcia, iti pannakitaripnongda iti Philippine National Police (PNP) a naangay idi Marso 3.
Maibatay iti datos ti PNP, kompirmado a mainaig iti eleksion ti 29 a bayolente a pasamak, malaksid iti 12 agingga iti 15 nga insidente nga im-imbestigaran pay laeng ti ahensia.
Kinuna ni Garcia a kaaduan kadagiti 29 nga insidente ti riribuk ti napasamak iti Bangsamoro Autonomous Region in Muslim Mindanao (BARMM).
Naangay ti taripnong da Garcia ken dagiti opisial ti PNP tapno adalenda ti kasasaad ti seguridad iti entero a pagilian ken kitaenda no adda pagkapuyan ti pannakaipatungpal iti seguridad ti eleksion.
Pannakaimbestigar kadagiti narsuod a rangtay, kiniddaw ni Sen. Pimentel
Nairaman kadagiti napagsasaritaanda ti kaudian nga insidente ti rinnupak kadagiti lugar ti BARMM.
Kinuna ti PNP nga adda 38 nga areas of concern, ngem kinuna ni Garcia a mabalin nga agbaliw daytoy gapu kadagiti kaudian a pasamak iti dadduma a paset ti pagilian, kangrunaan iti Mindanao.
Innayon ni Garcia a naan-anay a makitada ti agpayso a situasion no maidatagen dagiti yunit ti polisia ti reportda mainaig iti seguridad iti masakupanda a rehion.
Segun iti kaudian a datos, mapanen a 1,398 ti naarestar gapu iti panaglabsing iti gun ban, idinto a 1,422 a paltog ti nasamsam. (Aaron Recuenco/Manila Bulletin//Lito Hilidon/Bannawag)
