Dimmanonen iti aganay a ₱16.31 a trilion ti dagup ti utang Filipinas kalpasan nga immutang pay ti gobierno iti nayon a ₱261.5 a bilion idi Enero.
“Kontrolado pay met laeng daytoy a lebel,” kinuna ti Bureau of the Treasury (BTr) iti waragawagna ita a Martes, Marso 4, iti laksid ti panangipalgakna a 1.6 a porsiento ti nginatuan ti volume ti utang ti gobierno.
Kinuna ti BTr a “maitunos pay laeng daytoy iti target ti gobierno a mangsuportae iti panagdur-as ti ekonomia kabayatan ti pannakasigurado ti fiscal sustainability.”
Ti immadu nga utang a domestiko ken manipud ganggannaet, a giniddanan ti panagbaba ti balor ti pisos kontra iti US dollar, ti kangrunaan a nakagubuay iti panagngato ti utang, segun iti BTr.
Pannakaimbestigar kadagiti narsuod a rangtay, kiniddaw ni Sen. Pimentel
Buklen ti domestiko nga utang ti 67.9 a porsiento iti dagup nga utang, idinto a buklen met ti 32.1 a porsiento dagiti external nga utang.
Manipud iti ngudo ti Enero, ngimmato ti domestiko nga utang agingga iti ₱11.08 a triion, a ngimmato iti ₱153.7 a bilion wenno 1.4 a porsiento manipud idi Disiembre 2024.
Ti met ti panagbaba ti balor ti pisos no idilig iti doliar ti U.S. ti nangnayon pay iti ₱1.51 a bilion iti dagup nga utang.
Kabayatanna, dimmanon ti utang iti ganggannaet iti ₱5.23 a trilion idi Enero, a ngimmato iti ₱107.8 a bilion wenno 2.1 a porsiento manipud idi Disiembre 2024.
Gapu kadagiti dakdakkel nga obligasionna, nagbayad ti gobierno iti ₱2.02 a trilion nga utang idi napan a tawen. Itoy a tawen, ngumato ti pagbayad iti utang iti ₱2.05 a trilion. (Derco Rosal/MANILA BULLETIN)
