Binilin ti Korte Suprema (SC) ti Commission on Elections (COMELEC) nga iramanda ni Chito Bulatao Balintay a kas kandidato a para gobernador ti Zambales ken maipan ni naganna iti opisial a balota para iti 2025 midterm elections.
Binalusingsing ti SC ti pangngeddeng ti COMELEC a di nangpalubos ken ni Balintay, a maysa nga indigenous people (IP) iti probinsia, a mangipila iti certificate of candidacy (COC) a para gobernador ti Zambales.
Segun iti SC, inabuso ti COMELEC ti wayawayana gapu iti dina panangipalubos ken ni Balintay a mangipila iti COC. Kinuna ti SC a masapul nga amirisen ti COMELEC no nainkalintegan ken patas met laeng dagiti paglintegan daytoy.
Nangidatag ni Balintay iti COC idi maudi nga aldaw iti panagipila ken 25 a minuto sakbay ti oras ti panagserra ti panagipila. Ngem saan a kompleto ti COC ni Balintay ta agkurang iti maikalima a kopia ken documentary stamp. Naibalakad kenkuana a kompletuanna dagiti dokumento, ngem naglabesen iti oras idi nakasubli iti opisina ti COMELEC.
Napudot a panawen, agtalinaed gapu iti nabara nga angin nga aggapu iti Taaw Pasipiko
Maibatay iti Section 37 ti COMELEC Resolution No. 11045, saan a maawat wenno mamarkaan a kas "received" dagiti saan a kompleto a COC uray no naidatag daytoy iti husto nga oras.
Idi Enero 14, 2025, impaulog ti SC ti temporary restraining order (TRO) a manglapped iti COMELEC iti panangipatungpal daytoy iti pangngeddengna a di panangiraman ken ni Balintay.
Segun iti SC, inabuso ti COMELEC ti kalinteganna idi saanna a pinalubosan ni Balintay a mangipila iti COC. (Rey G. Panaligan/Manila Bulletin//Lito Hilidon/Bannawag)
