Impablaak ti administrasion ni Presidente ti U.S. Donald Trump idi Martes, Marso 4, ti listaan ti nasurok a 440 a federal properties nga inlasinda a maiserran wenno mailako, a pakairamanan ti headquarters ti Federal Bureau of Investigation (FBI) ken ti main building ti Department of Justice, kalpasan a mabilang dagitoy a "saan a nangruna kadagiti operasion ti gobierno."
Nupay kasta, kalpasan ti sumagmamano nga oras, binaliwan ti administrasion ti nasao a listaan ket napagbalin laengen a 320 nga entry--a saanen a nairaman dagiti adda iti Washington, D.C. Saan a dagus a simmungbat ti General Services Administration (GSA), a nangipablaak ti listaan, kadagiti saludsod maipapan ti pannakabaliw ti listaan ken no apay a nagadu la unay a properties ti naikkat.
Nairaman iti immuna a listaan ti sumagmamano kadagiti nalatak a pasdek ti pagilian, kasta met dagiti courthouse, dagiti opisina, ken uray pay ti parking garage ken sinakupna ti dandani isu amin nga estado. Iti Washington, D.C., nairaman iti umuna a listaan ti J. Edgar Hoover Building, nga agserserbi a kas headquarters ti FBI; ti Robert F. Kennedy Department of Justice Building; ti pasdek ti Old Post Office, a dati a nangtarawidwidan ni Trump iti maysa nga otel; ken ti headquarters ti American Red Cross. Nailista pay ti adu a headquarters dagiti ahensia, a pakairamanan ti Department of Labor ken Department of Housing and Urban Development.
Iti sabali pay a paset ti pagilian, pinuntiria ti administrasion ti Major General Emmett J. Bean Federal Center iti Indiana, ti Sam Nunn Atlanta Federal Center, ti Speaker Nancy Pelosi Federal Building iti San Francisco, ken ti headquarters ti U.S. Mission ti United Nation iti New York. Agarup 80% kadagiti 2.4 a milion a pederal a trabahador ti pagilian ket nakabase iti ruar ti metropolitan Washington, D.C.
Pannakaiserra ti Departamento ti Edukasion ti U.S., imbilin ni Trump
"Ilaslasinmi dagiti pasdek ken pasilidad a saan a kangrunaan kadagiti operasion ti gobierno, wenno saan a kangrunaan a sanikua, tapno a mai-dispose," kinuna ti GSA maipapan iti listaan ti 443 a properties. Segun iti GSA, ti pannakailako dagiti properties ket "mangsigurado a dagti doliar dagiti agbaybayad iti buis ket saanen a mabusbos kadagiti bakante wenno saan unay a maus-usar a pederal nga espasio." Innayonna a ti nasao a gandat, "mangtulong a mangikkat iti nagastos a panangmantenar ken mangipalubos a mangkita kadagiti nangato ti kalidadna a work environment a mangsuportar kadagiti mision dagiti ahensia."
Paset ti nasao a gandat ti panagregget da Trump ken ti bilionario a ni Elon Musk a mangkissay iti kadakkel ti federal workforce ken mangkissay iti gastos ti gobierno. Segun kada Trump ken Musk, ti panangilako kadagiti nailasin a pasdek ket makasalbar iti pederal a gobierno iti ginasut a milion a doliar, kabayatan pay ti panangbalbaliwda iti operasion dagiti kangrunaan nga ahensia ti gabinete a pinunduan ti Kongreso. Kiniddaw met ti administrasion ni Trump nga inaldaw nga agreport dagiti federal worker kadagiti opisinada.
Sumagmamano kadagiti pasdek nga immuna a nailista a maiserra wenno mailako ket opisina dagiti ahensia a nabayagen a babbabalawen ken pumpuntiriaen ni Trump, nangruna ti FBI ken Justice Department.
Ti pannakaikkat ti pederal nga espasio ti opisina ket kangrunaan a prioridad ti baro nga administrasion. Idi napan a bulan, nakaawat dagiti rehional a manedier ti GSA iti mensahe manipud iti headquarters ti ahensia iti Washington a nangbilin kadakuada a rugianda a gibusan dagiti lease ti amin nga agarup 7,500 a pederal nga opisina iti entero a pagilian.
Iti maysa a follow-up meeting, nabagaan dagiti regional manager ti GSA a masapul a magibusanda ti agingga iti 300 a lease iti kada aldaw, segun iti maysa nga empleado, a nagsao iti kondision a di maipakaammo ti naganna gapu iti amakna a mabalsan.
Inlista met ti Department of Government Efficiency (DOGE) nga idauluan ni Musk ti pinulpullo a nakanselar a lease ti opisina, iti opisial a website ti DOGE, a nangpataud kadagiti saludsod iti entero a pagilian no ania ti mapasamak kadagiti maipapaay a serbisio manipud kadagita nga opisina.
Karaman kadagiti property iti listaan a nairuar ket ti dakkel a pederal a pasdek ken courthouse iti Los Angeles; maysa a pederal a pasdek iti Oklahoma City a sukat ti nabomba a pasdek idi 1995; maysa a computing center ti IRS iti West Virginia ken service centers ti IRS iti Ogden, Utah; Memphis, Tennessee; Atlanta; Austin, Texas; Andover, Massachusetts; ken Holtsville, New York.
Mairaman pay dagiti a pasdek nga addaan kadagiti nagan dagiti civil rights icon a da Martin Luther King Jr. iti Atlanta ken Rosa Parks iti Detroit, ken ti estasion ti bus ti Montgomery, Alabama a napateg idi iti tignay ti civil rights ken agserserbi itan a kas Freedom Rides Museum. (Associated Press)
