Panggep ti Land Transportation Franchising and Regulatory Board (LTFRB) nga agbalinton a maysa a kangrunaan a kasapulan iti panangpabaro iti prangkisa ti public utility vehicles (PUVs) ti road safety training.
Kinuna ni daulo ti LTFRB Teofilo Guadiz III nga agbalin a komprehensibo ti road safety training tapno mapabassit ti bilang dagiti aksidente iti kalsada--a 157 tunggal aldaw iti Metro Manila idi 2022 segun iti Metropolitan Manila Development Authority (MMDA) a nangipakaammo nga agdagup iti 44,493 ti aksidente iti kalsada manipud Enero 2023 agingga iti Hulio 2023.
Umuna a maipatungpal daytoy a programa a panagsanay iti Metro Manila ken agpaay laeng kadagiti drayber ken konduktor ti bus ken trak.
Kalpasan ti tallo a bulan, maisaknap daytoy iti dadduma pay a siudad iti Filipinas. Iti maikadua a tawenna, mairamanton dagiti UV ken dyip, ken iti maudi a paset, dagiti motorsiklo, taksi, ken TNVS. (Aaron Recuenco/Manila Bulletin//Lito Hilidon/Bannawag)
