Agtalinaed a natibker ti relasion ti Filipinas ken Estados Unidos (US) nupay inaklon ni Embahador ti Filipinas iti Washington Jose Manuel “Babe” Romualdez a masapul a sisasagana ti Filipinas a mangidepensa iti bagbagina iti masakbayan.
Iti maysa nga interbiu itay Marso 4, impasigurado ni Romualdez nga ikagkagumaan ni Presidente Ferdinand Marcos Jr. a papigsaen ti armada ti pagilian ken ti ekonomia daytoy tapno kabaelan ti Filipinas a salakniban ti bagina.
Inlawlawag ni Romualdez nga agbaliwbaliw ti aliansa dagiti pagilian--mabalin a natibker ita, ngem saanton inton bigat--isu a nasken a sisasagana ti Filipinas.
Kinuna daytoy ni Romualdez a kalpasan ti panagriri da Presidente ti US Donald Trump ken Presidente ti Ukraine Volodymyr Zelenskyy, ken ti panangibabawi ti U.S. iti tulong-militar iti nabayagen a kaaliadona a Ukraine.
Napudot a panawen, agtalinaed gapu iti nabara nga angin nga aggapu iti Taaw Pasipiko
Iti sabali a bangir, isagsagana ti gobierno ti naikeddeng a personal a panagsarita da Trump ken Marcos inton Abril wenno Mayo. (Raymund Antonio/Manila Bulletin//Lito Hilidon/Bannawag)
