Saan man la a mariribukan ni Surigao del Norte 2nd district Rep. Robert Ace Barbers kadagiti kaso ti libel nga impila ti sumagmamano a vlogger kontra kenkuana.
Nupay kasta, segun ken Barbers, masdaaw no apay a dagitoy nga online content creator ket indarumda isuna mainaig iti isyu ti "narco-vloggers" (dagiti vlogger a mapapati a tangtangdanan wenno baybayadan dagiti drug lord) idinto nga awan met a pulos ti dinakamatna wenno innagananna a partikular a tao.
Sakbayna, nagbitla ti diputado manipud Mindanao iti dua a pribilehio iti plenario, a nangkondenar iti sumagmamano a maipagarup a narco-vloggers gapu iti kinaawan panagraemda, panagusar kadagiti rasaw ken dadduma pay nga abusado a balbalikas maibusor iti sumagmamano a kameng ti quad-committee ken tri-committee ti House of Representatives.
Kinunana a nangnangruna a naikkan ti tri-comm iti annongen a mangaramid iti linteg a mangdusa iti panagabuso ken di umisu nga aramid dagiti sumagmamano a vlogger, a mabalin man wenno saan a pumponduan ti kuarta a nagtaud ti illegal drug trade.
Sara Duterte, agsagsaganan nga agawid iti pagilian
“No dagidiay nangipila iti libel cases maibusor kaniak ket mariknada nga isuda ket narco-vloggers, ngarud mabalin a kunaen wenno kayatna a sawenn a pusno ngarud gayam a kastada. Apay a masaknarankayo no saankayo met a sibabasol?" saludsod ni Barbers.
“Naynay met a sursurotek ti probision ti Konstitusion maipapan iti nawaya a panagsao ken panagyebkas, ngem daytoy ket saan a mabalin ken saan koma a mausar kas lisensia a mangdadael iti reputasion ti tao ken pagsasawanda iti di maiparbeng, ken mangparnuay iti kinaulbod wenno peke a salaysay ken linia ti propaganda. Ket patiek unay a saanda nga ar-aramidenda dayta a libre,” kinunana.
Kinuna ni Barbers nga adu kadagiti nasao a vlogger a nangipila iti certiorari petition iti Korte Suprema ken nangipila iti libel case kontra kenkuana ti nabilin nga agparang iti tri-comm hearings iti online a panagiwaras iti fake news, ngem dandani amin dagitoy ket saan wenno nagkedked nga agparang wenno umatendar.
"Nalawag a kayatda laeng a salakniban ida dagiti korte kadagiti aramidda a mangisaknap iti kinaulbod ken pammadakes a sasao maibusor kadagiti tattao a di umanamong kadagiti politikal a kapanunotanda," kinunana.
“Ket sentido komon ket mangidiktar nga adu, no saan nga amin, kadagitoy a partikular a vlogger ti mangibagbaga iti isu met laeng a linia ti propaganda dagiti amongda," innayonna.
"Ti saanda a panagatendar kadagiti tri-comm public hearing ket mangipaneknek iti kinatakrot ken dida matakderan dagiti ibagbagada ken iwarwarasda a kinaulbod iti social media," kinuna pay ni Barbers.
Ni Barbers ti overall chairman ti quad-comm ken aktibo a partisipante kadagiti tri-comm hearing. (Ellson Quismorio/MB)
