Sinukimat ni Presidente Ferdinand Marcos Jr. ti ₱67.48 a milion a multi-stage rice processing complex a proyekto iti Barangay Ipil, Echague, Isabela a naluktan idi Nobiembre 28, 2024.
Kadua ni Presidente Marcos da Sekretario ti Department of Public Works and Highways (DPWH) Manuel Bonoan; Sekretario ti Department of Agriculture (DA) Francisco Tiu-Laurel Jr.; Gobernador ti Isabela Rodolfo Albano III, ken Mayor ti Echague Francis Faustino Dy.
Paset ti Rice Competitiveness Enhancement Fund (RCEF) Mechanization Program ti gobierno daytoy a proyekto a maawagan iti Rice Processing System II, ken manamnama a pagnumaran dagiti rinibu a mannalon iti probinsia.
Mairaman iti pasdek ti kabaruanan a rice mill a kabaelanna ti mangbayo iti tallo a tonelada tunggal oras nga agbalor iti ₱48.58 a milion ken lima a recirculating dryers, a kabaelanna ti 12 tonelada tunggal maysa, agbalor iti ₱18.9 a milion.
Napudot a panawen, agtalinaed gapu iti nabara nga angin nga aggapu iti Taaw Pasipiko
Segun iti DA, nabuangay ti RCEF babaen ti Republic Act 11203 tapno mapasayaat ti pannakikompetensia ken ngumato ti sapul dagiti mannalon.
Pagnumaran daytoy ti sibubukel a gobierno probinsial ti Isabela nga addaan iti 70,556 a mannalon a nailista iti Registry System for Basic Sectors in Agriculture (RSBSA), nga agmulmula iti pagay iti 66,303 ektaria a daga. (Betheena Unite/Manila Bulletin//Lito Hilidon/Bannawag)
