Impalgak ti Malakanyang a posible nga underdesign wenno saan a nasayaat a pannakadisenio ti mabalin a nakaigapuan ti pannakarsuod ti maysa nga span ti Cabagan-Santa Maria Bridge iti Isabela.
Segun ken ni Presidential Communications Office (PCO) Undersecretary Claire Castro, suksukimaten ita ti gobierno ti posibilidad a saan a nasayaat ti pannakadisenio ti nasao a rangtay.
Kinuna ni Castro a ti panangtingiting no underdesign ti pudno a makagapu iti insidente ket paset ti maiwayat a naing-inget nga imbestigasion ti Department of Public Works and Highways (DPWH).
"Kitaenda a talaga ti maibagbaga nga underdesigned ti rangtay, mo ania ti makagapu ta apay a di kabaelan ti rangtay dagiti nadadagsen a lugan, ta segun kadagiti immuna a panagimbestigar, nairanta laeng a para kadagiti nalalag-an a lugan," kinuna ni Castro.
Sara Duterte, agsagsaganan nga agawid iti pagilian
Kinuna pay ti opisial a nupay awan pay ti pinal, mabalin met a sungsungbatan dagiti kompania nga akinkukua kadagiti trak a limmasat iti rangtay, malaksid kadagiti indibidual a nairaman iti pannakaipatungpal ti proyekto, a nalpas ita laeng a tawen.
Nangrugi ti konstruksion ti rangtay idi Nobiembre 2014 ken nalpas, kalpasan ti nasurok a 10 a tawen, idi Pebrero 1, 2025, nga addaan dagup a nagastos a ₱1,225,537,087.92.
Segun ken ni Castro, 90 a porsiento ti konstruksion ti rangtay ket impatungpal ti DPWH iti termino ni dati a presidente Rodrigo Duterte. (Betheena Unite/MB)
