Im-imbestigaren ti Ilocos Norte Electric Cooperative (INEC) ti naduktalan itay nabiit nga agarup 600 a member-consumers a saan a nakarehistro iti sistemana.
Iti press conference a naangay idi Marso 6 iti main office ti INEC iti ili ti Dingras, Ilocos Norte, kinuna ni acting general manager ti INEC Cipriano Martinez a dagitoy a saan a nairehistro a consumer ti natakuatan a kangrunaan a rason ti nangato a masingsingir iti systems loss a baybayadan dagiti rehistrado a consumer.
"Nairanta man wenno saan, masapul unay nga aturentayo dayta," kinuna ni Martinez.
Segun ken ni Martinez, agbaybayad dagiti member-consumer ti INEC iti mapan a ₱10 a milion iti kada bulan gapu iti systems loss charges.
Ti systems loss ket isu ti saan a masingir a koriente wenno napukaw a koriente gapu iti panagtakaw iti koriente ("jumper") wenno babaen ti proseso ti transmision ken distribusion ti koriente.
10 nga SPES Interns, naideploy iti LGU SANTA
"Daytoy (a systems loss) ket buklen iti agarup 10 a porsiento iti dagup nga electric bill dagiti consumer," kinuna ni Martinez.
Manipud iti mapan a 10 a porsiento a systems loss, agarup 6 a porsiento ti mabalin a mainaig iti teknikal ken ti nabati nga 4 a porsiento iti non-technical.
"Im-imbestigarenmi daytoy ket masapul nga agsardeng daytoy," kinunana.
Iti napalabas a dua a lawas, naisayangkat ti house-to-house survey kadagiti 185,000 a member-consumer-owners ti INEC tapno masigurado a masukimat amin dagitoy.
Ti pannakaisayangkat ti surbey ket naiwayat iti babaen ti pammilin ti Bureau of the Internal Revenue (BIR) iti INEC nga i-update daytoy dagiti rekordna, agraman ti pannakairehistro dagiti meter gadget-na, tapno maikeddeng ti umno a mabuisan a mapastrekna. (Leilanie Adriano/PNA)
