Mapan a 536,000 a Filipino ti nainayon iti dagup a bilang dagiti awanan panggedan nga indibidual idi Enero 2025, segun iti Philippine Statistics Authority (PSA), gapuna a ti dati a 1.63 milion nga awanan panggedan idi Disiembre 2024, ngimmaton iti aganay a 2.17 a milion.
Daytoy a napardas a yaadu dagiti awanan panggedan a Filipino ti namagbalin iti bulan ti Enero a kangatuan iti unemployment rate (4.3 a porsiento) no maidilig iti napalabas nga innem a bulan.
Kabayatanna, bimmaba ti employment rate iti 1.2 porsiento manipud iti 96.9 porsiento idi Disiembre 2024 agingga iti 95.7 porsiento idi Enero 2025.
Bimmaba met ti bilang dagiti indibidual a mangmangged iti 1.7 milion iti binulan, manipud 50.19 milion idi Disiembre 2024 a nagbalin laengen a 48.49 a milion idi Enero 2025.
Sara Duterte, agsagsaganan nga agawid iti pagilian
Nupay kasta, nangatngato met daytoy iti 2.59 milion no idilig iti bilang dagiti mangmangged a Filipino idi Enero 2025, a mapan a 45.90 a milion.
Dagiti sektor nga addaan iti kadakkelan a tinawen a panagbaba ti panggedan ket manufacturing (bimmaba iti 209,000), propesional ken teknikal a serbisio (58,000), arte ken paglinglingayan (29,000), konstruksion (11,000), ken impormasion ken komunikasion (9,000).
Segun ken ni Deputy National Statistician Divina Gracia L. Del Prado, ti panagbaba ti panggedan ket mabalin a mainaig iti gagangay a post-holiday slowdown. Idi Disiembre, immadu ti panggedan gapu iti yaadu ti panagkasapulan kadagiti trabahador kas panagsagana iti panawen ti Paskua. Idi madanon ti Enero, natural a bimassit daytoy a panagkasapulan, kinuna ni Del Prado. (Derco Rosal/MB)
