Nalpasen ti Department of Public Works and Highways (DPWH) ti 2.2 a kilometro a Bangui Bypass Road iti Ilocos Norte, maysa a major infrastrucure project a manamnama a mangpalukay iti trapiko ken mangpanam-ay iti panagbiahe.
Kinuna ni Direktor ti DPWH Region 1 Ronnel Tan a ti four-lane ken agpateg iti ₱313.21-milion a bypass road project ket manamnama a mangpabiit iti oras ti panagbiahe iti nagbaetan ti Barangay Bacsil ken Barangay Nagbalagan iti Bangui manipud 10 a minuto agingga iti uppat agingga iti lima a minuto.
"Ti nakompleto a proyekto ti bypass road ket maysa kadagiti testamento iti panagregget ti administrasion ni Presidente Ferdinand R. Marcos Jr. a mangrisut kadagiti parikut iti trapiko ken mangpasayaat iti pannakasustiner ti impraestruktura iti pagilian, a mangsigurado a dagiti kangrunaan a kasapulan ken serbisio ket ma-access ti amin," kinuna ni Tan.
Ti bypass road, nga addaan iti drainage, slope protection structure, road safety measures, streetlights, ken 46.30-metro a bridge component, ket naaramid tapno mataming ti nakaro a panagdudupudop ti luglugan iti town proper ti Bangui, a mangpasayaat iti nasayud a pannakaibiahe dagiti lokal a tagilako ken serbisio iti bisinidad.
600 a di rehistrado a member-consumer, im-imbestigaren ti INEC
"Nanamnam-ay itan ti panagbiahe nga agpaamianan ta nalawlawan dagiti kalsada ken nalpasen ti bypass road ti Bangui," kinuna ni Celia Asuncion, maysa nga negosiante manipud iti ili ti San Nicolas nga agbibiahe iti probinsia ti Cagayan maminsan iti makalawas tapno aglako iti dry goods.
Kinuna ni Asuncion a namnamaenna a maileppas iti mabiit ti ad-adu pay a high-impact projects, kas iti madama a maar-aramid a maikadua a viaduct ti Pagudpud, tapno maliklikan ti panagdudupudop ti trapiko iti naynay a maregreggaay a paset ti Barangay Pancian iti Pagudpod, nga asideg iti Bangui. (Leilanie Adriano/PNA)
