Dinagadag ti Department of Transportation (DOTr) dagiti drayber ken operator ti bus a surotenda ti naikeddeng a 45-segundo a panagsardengda iti EDSA Busway, ta 90 a porsienton kadagiti station timer ti agan-andar.
Kinuna ni Sekretario ti DOTr Vince Dizon itay Marso 7 nga agbantay dagiti kameng ti Special Action and Intelligence Committee for Transportation (SAICT) ti DOTr, kadagiti estasion iti northbound ken southbound tapno masigurado ti panagtungpal dagiti maseknan.
Dua a pannakabagi ti maisaad iti tunggal estasion tapno mangipalagip iti 45-segundo a pagannurotan.
Nupay naisaad idin dagiti pagorasan kadagiti busway, masansan a di ikankano dagiti drayber daytoy ket agurayda iti adu pay a pasahero, banag a mangpairut iti trapiko.
Kabaruanan a tangke, artileria, naitampok iti anibersario ti Army
Dagitoy a pannakapapintas ti dinakamat idi ni Dizon a "mabiit" a solusion a maaramid ti DOTr tapno mapalag-an ti biahe dagiti komiuter.
Panggep ti DOTr a mabaliwan ti busway kas moderno a ruta ti transportasion inton umay a tawen babaen ti pannakaipatakder iti maysa a concourse a maisina iti Metro Rail Transit 3 (MRT-3). Maaramid daytoy babaen ti public-private partnership (PPP). (Dexter Barro II/Manila Bulletin//Lito Hilidon/Bannawag)
