Impakita ti Philippine Army (PA) dagiti light tanks ken artileria nga igamda iti live-fire a panagsanay a mangsubok iti kinasaganada nga agresponde no adda gubat.
Ti live-fire exercise ti naitampok iti Combined Arms Training Exercise (CATEX) "Katihan" Battle Phase 2 a naangay iti Combat Readiness Training Area iti Fort Magsaysay, Nueva Ecija, agraman ti Crow Valley Gunnery Range iti Capas, Tarlac itay Marso 7.
Segun ken ni Lt. Gen. Roy M. Galido, daulo ti PA, napateg ti panagsanay iti gungloda tapno mapasayaat ti kabaelanda a mangtungpal iti annongenda.
Nausar iti CATEX dagiti kabaruanan nga ATMOS2000 self-propelled (155mm) howitzers ti Army Artillery Regiment, ti Sabrah light tanks nga addaan iti 105mm main guns ti Armor Division, a nagatang iti Elbit Systems iti Israel idi napan a tawen.
Isasangpet ti 22 a Black Hawk a helikopter, namnamaen ti PAF ita a tawen
Agarup 6,000 a soldado ti nakipaset iti panagsanay manipud Marso 3 agingga 22. Ti CATEX ti naitampok iti maika-128 nga anibersario ti Philippine Army. (Martin Sadongdong/Manila Bulletin//Lito Hilidon/Bannawag)
