Kalpasan ti kontrobersial a pannakarsuod ti maysa a paset ti rangtay iti Isabela itay nabiit, kinuna ni sekretario ti Department of Budget and Management (DBM) Amenah F. Pangandaman nga agdalanen iti naing-inget a proseso ti panagplano ken panangapbrobar dagiti proyekto nga impraestruktura iti masakbayan.
Naduktalan kadagiti imbestigasion a dagiti cost-cutting measure ti nangkissay iti badiet ti rangtay manipud iti damo a ₱1.8 bilion, napagbalin laegen a nakurang a ₱1 bilion, a nangpataud kadagiti pakaseknan maipapan iti quality control.
Kinuna ni Pangandaman kadagiti reporter iti maysa a pasken idi Marso 6, a kabayatan nga agtultuloy latta ti pannakairuar ti badiet para kadagiti proyekto nga impraestruktura, maipatungpal ti nais-istrikto nga annutoten iti panagplano ken panangaprobar.
“Ti napateg ket ti umno a panagplano,” kinuna ni Pangandaman, a nangdakamat a ti panagpalia ti rangtay (iti Isabela) ket nainaig kadagiti pagkamtudan ti disenio ken kinakapuy ti estruktura.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Impasigurado ni Pangandaman nga iti sumaruno a dua a tawen, naing-ingeten ti DBM no maipapan iti pannakaaprobar dagiti disenio ti proyekto nga impraestruktura nga isingasing ti Department of Public Works and Highways (DPWH) ken dadduma pay a departamento ti impraestruktura.
“Mabalin a siguraduenmi nga ipaayda kadakami ti detailed engineering design (DED) dagitoy a proyekto,” kinunana.
Idi napagsaludsodan no dagiti maipakat a naing-inget a requirement ket mangpabayag iti pannakairuar ti badiet, kinuna ni Pangandaman a “saan met.”
“Kayatmi laeng nga itedda (dagiti requirement) sakbay ti pannakaisagana ti badiet, saan ket a kalpasanna,” inlawlawag ni Pangandaman. (Derco Rosal/MANILA BULLETIN)
