Kiniddaw dagiti abogado ti gobierno iti Korte Suprema (SC) a mawaswas koma ti petision a kontra iti 2025 national budget, gapu iti depektibo a proseso ken kinakurang ti merito daytoy.
Kinuestionar ti petision ti legalidad ti Republic Act No. 12116, wenno ti 2025 General Appropriations Act (GAA).
Iti komento nga indatag ti Office of the Solicitor General (OSG), kinunana a pananglapped iti pannakaipatungpal iti linteg ti gandat ti petision, saan ketdi a panangtubay iti legalidad daytoy.
Kayat a pawaswas ti OSG ti petision a nagkiddaw a maideklarar a kas imbalido ti nailian a badiet gapu ta adda blangko iti dadduma a paset daytoy, nangruna iti kopia ti Bicameral Conference Committee (BCC) report.
Napudot a panawen, agtalinaed gapu iti nabara nga angin nga aggapu iti Taaw Pasipiko
Segun iti OSG, ti enrolled bill, saan a ti Committee Report, ti masurot ken maanamongan iti dadduma a sanga ti gobierno, ket ania man ti napalabas a bersion daytoy a report ket biang laeng ti Kongreso.
Kinuna ti OSG a nagdalan iti narikut ti pannakatingiting ti naipaulog a 2025 GAA. Ti di pananganamong ti Presidente iti dadduma a paset ti 2025 GAA ti mangipakita iti annongen ti ehekutibo a mangsigurado a dagiti nailatang a pondo ket maitunos iti prioridad ti gobierno.
Maangay ti oral arguments iti SC iti Siudad ti Baguio inton Abril 1. (Rey G. Panaligan/Manila Bulletin//Lito Hilidon/Bannawag)
