Makasalisal dagiti siklista a Filipino dagiti ganggannaet a siklista iti mapadpadaanan a Tour of Luzon a maaramid inton sumaruno a bulan, kalpasan a naisardeng iti agarup lima a tawen, a mangted kadagiti siklista iti karit ti kalgaw ken ti makapagagar a panaglulumbada a sumang-at iti pantok ti kabambantayan iti inda panagleppas iti Camp John Hay iti Siudad ti Baguio.
Organisaren ti PhilCycling babaen ti suporta ti Metro Pacific Tollways Corporation, DuckWorld PH, ken Philippine Sports Commission, agsubli ti Tour of Luzon babaen ti 8-stage bikefest a marugian iti Siudad ti Laoag ken agpababa iti Vigan, Agoo, Clark, Lingayen, sa umuli iti Siudad ti Baguio City, iti dagup a distansia a 1,050 a kilometro manipud Abril 23 agingga iti Mayo 1.
Sangapulo ket lima a team ti nagkompirmar a makipaset, nga idauluan dagiti continental team ti UCI a 7-Eleven Roadbike Philippines, Standard Insurance Philippines, Victoria Cycling Team, ken Go For Gold Cycling Team.
Makipaset met iti kompetision dagiti ganggannaet a bunggoy ti siklista manipud iti Indonesia, Singapore, Vietnam, ken Thailand.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Mairaman pay dagiti dadduma a team kas iti Philippine Army, Excellent Noodles, D’Reyna, Dandex Multi-Sports, ken MPT DriveHub wenno ETC.
Aganay a ₱1.5 a milion ti napagtitipon a premio.
Ti Tour of Luzon ti maysa kadagiti kauunaan ken most challenging a lumba ti bisikleta iti Asia sipud nairugi idi 1955, a tinawen a naisayangkat agingga idi 1998.
Naisubli laeng daytoy a masegseggaan a lumba iti kalgaw idi 2002 kalpasan ti uppat a tawen a pannakaisardengna. Naituloy a kas Le Tour de Filipinas sakbay ti pandemia idi 2020 a pannakaisardengna manen. (Mark Rey Montejo/MANILA BULLETIN)
