Immaboten iti 8.6 a milion dagiti babbai a Filipino nga agus-usar iti kontraseptibo, ket pills ti kalatakan a wagas ti panangkontrol iti panagsikog, kas impalgak ti Commission on Population and Development (CPD).
Kinuna ti CPD a nangatngato daytoy ngem iti 8.3 a milion a nairekord idi 2022, a mangipakita iti naiduma a panagdur-as ti woman empowerment.
Segun iti CPD, katukad ti yaadu ti bilang dagiti babbai nga agus-usar iti kontraseptibo ti agdama a kasasaad ti pagilian ken ipakitana a nababbaba ti panaganak dagiti babbai iti 1.9 nga ubbing. Ti bilang ket adda iti baba ti replacement level.
“Adayon ti nagtengtayo ngem adu pay nasken nga aramidentayo. Kasapulantayo ti ad-adu a gundaway, nangnangruna kadagiti tay-ak a domdominaran dagiti lallaki. Laglagipentayo a dagiti babbai, addaan iti nadumaduma nga akem iti pamilia, isuda ti kangrunaan a mangay-aywan, responsabilidadda iti panangtaraken kadagiti ubbing ken panangtarawidwid iti pagtaengan,” kinuna ti ehekutibo a direktor ti CPD, ni Undersecretary Lisa Grace S. Bersales
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Maibatay iti datos ti CPD, 34.48 a porsiento kadagiti babbai ti kaykayatda ti agusar iti pills, nga isu ti mamagbaliln itoy a kalatakan a wagas ti pananglapped iti panagsikog. Sinaruno daytoy dagiti injectable nga addaan iti 20.66 a porsiento.
Iti sabali a bangir, kinuna ti CPD a nairekordda ti panagngato ti bilang dagiti babbai nga agus-usar iti implants. (Aaron Recuenco/MANILA BULLETIN)
