Gapu iti panagadu ti online gaming a mabalin ti makisugal babaen dagiti mobile phone app, kinuna ni ni Senate President Francis “Chiz” Escudero nga “adda itan casino iti bulsa ti tunggal Filipino.”
Naibaga ni Escudero daytoy iti panangkiddawna iti gobierno a mangisayangkat iti nasaknap a financial ken social audit kadagiti nga internet gambling platform.
Segun kenkuana, ti kinalaka ti pannaka-access kadagitoy nga online gambling app ti rumbeng a mangtignay kadagiti state regulator a mangisayangkat iti “social cost-state benefit” analysis iti aktibidad dagiti Philippine Inland Gaming Operator wenno PIGO.
Kinunana nga usaren koma ti gobierno iti PIGO ti isu met laeng nga accounting a nausar iti pannakatingiting ken pannakaiparit kadagiti Philippine Offshore Gaming Operator (POGO).
Pannakaimbestigar ti 'tanim-bala,' panaglibas ti pugante a Koreano, imbilin ni Marcos
“Kayatko a makita a ti gobierno, ipaayanna iti isu met laeng a naiget a panangamiris ti PIGO a kas iti inaramidna iti POGO," kinunana.
Imbatad ti presidente ti Ssenado a nakaawat ti opisinana kadagiti report manipud kadagiti industry insider a ti dagup nga online bets ket mabalin a dumanon iti nagbaetan ti ₱600-billion ken ₱1-trillion iti makatawen, wenno doble pay a nasursurok ngem iti naipadamag a gross annual sales ti maysa a nalatak a fastfood chain iti pagilian.
Iti panangamiris kadagiti social cost, kinuna ni Escudero a nasken unay a siguraduen ti gobierno a ti panangtingiting kadagiti PIGO ket “lumbes iti panagbilang iti pisos ken sentimo.”
“Di kadi pudno a makaadik dagitoy nga app ket imbes a mausar ti kuarta a para iti taraon ti pamilia wenno gatas para kadagiti ubbing, mausar laeng a pusta iti sugal?” kinunana.
“Ket di kad' pudno a ti tao a mairubo iti sugal ket ad-adda a kumpet iti krimen ken kalokuan?” nakunana pay.
Idinto a dagiti pisikal a casino ket mabalinda a lapdan a sumrek dagiti menor de edad kadagiti pasilidadda, kinuna ni Escudero nga awan ti manglapped iti “maysa a grade schooler nga ag-login iti PIGO account-na.” (Hannah L. Torregoza/MB)
