Impakaammo ti Makati City Police idi Biernes, Marso 7, a mangipilada iti darum kontra iti ganggannaet a lalaki, a mapapati a maysa a Chinese national, a siraranggas a nangkugkugtar iti maysa a pusa ti komunidad iti maysa a parke iti Ayala Avenue, Makati City. Natay ti pusa gapu iti sinagrapna a kinaranggas.
Iti maysa nga statement, kinuna ti polisia a maipila ti kaso kontra iti lalaki gapu iti panaglabsingna iti Republic Act No. 8485 wenno ti Animal Welfare Act of 1998, a naamendaran kas Republic Act No. 10631.
"Natiliwan ti suspek iti CCTV footage a nangidas-al iti animal cruelty iti agarup 8:18 ri bigat idi Enero 4, 2025, iti maysa a paset ti Ayala Triangle, Makati City. Makita iti footage a kinugtaran ti suspek ti stray a pusa, a nagresulta iti ipapatayna, a nalawag a panaglabsing iti linteg," kinuna ti polisia.
"Segun iti excerpt report iti blotter manipud iti Barangay Bel-Air, nagresponde da OIC William Ontoy ken dagiti kameng ti Makati INFRA Security Patrol a da SG Jerome S. Bayaras ken SG Cano iti report maipapan iti panangranggas iti ayup ket nakikoordinarda iti Makati City Police tapno maimbestegar ti insidente. Iti laksid ti kaadda ti dua a residente a nakasaksi iti nasao nga aramid, nagkedkedda a mangipila iti reklamo," innayonna.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Isu a ti Makati City Police a mismo ti agakem a kas nominal complainant iti nasao nga insidente.
Maisagsaganan ti pormal a reklamo a maipila iti Office of the City Prosecutor iti Siudad ti Makati.
Nag-viral ti nasao nga insidente iti social media kalpasan a nagkiddaw ti animal welfare group a Compassion and Responsibility for Animals (CARA) Welfare Philippines iti tulong manipud iti publiko tapno mabigbig ti ganggannaet a lalaki a nangranggas iti pusa ti komunidad a managan iti Ken.
Segun iti grupo, natiliwan iti CCTV ti ganggannaet a nangkugtar iti pusa kabayatan a magmagna iti aglawlaw ti Ayala Triangle Gardens. Natay a dagus ni Ken.
"Iti babaen ti Republic Act No. 8485 (Animal Welfare Act of 1998) kas inamendaran ti RA 10631, dagiti aramid ti kinranggas, panagabuso, ken panangpapatay kadagiti ayup ket madusa babaen ti multa ken pannakaibalud. Maqsapul a maduda daytoy a brutal nga aramid. Saan a nainkalintegan ti kinaranggas kadagiti ayup, ket dagiti mangar-aramid kadagitoy a kinaranggas ket napeggad para kadagiti ayup ken iti kagimongan," impaganetget ti CARA.
Segun iti CARA, idiayaanda iti gunggona a kuarta ti asino man a makaited iti kompirmado nga impormasion a makaibaga no sadino ti lokasion ti suspek. (Patrick Garcia/MANILA BULLETIN)
