Naammuan iti maysa a surbey a naiwayat iti entero a pagilian nga ipangpangruna dagiti millennial a Filipino ti kina-successfull wenno naballigi ngem ti naragsak a pannakirelasion, a pakakitaan iti panagbalbaliw dagiti tagipatgen ti henerasion.
Maawagan a kas millenials ti henerasion a nayanak manipud 1981 agingga iti 1996.
Segun iti surbey, a naisayangakt iti 402 a respondents ken addaan 5% a margin of error, a 64% kadagiti Filipino a millennial ti mangibilang iti “panagbalin a naballigi” kas kangrunaan a prioridadda-—nalablabes ngem iti 50% a nangiranggo a nasnasken ti “naragsak a relasion.”
Ipamatmat met dagiti resulta ti panagduduma dagiti prioridad a maibatay iti sekso. Kadagiti mangipangruna iti balligi, 55% ti babbai, ken 45% ti lallaki. Ti met pannakarikna a "safe and secure" ket importante para iti 62% kadagiti napagsaludsodan, nga ad-adu (53%) dagiti lallaki a mangibilang dagiti babbai (47%).
Pannakaimbestigar ti 'tanim-bala,' panaglibas ti pugante a Koreano, imbilin ni Marcos
Ti tarigagay para iti naragsak a relasion ket agpada a nabingay iti nagbaetan dagiti lallaki ken babbai, a 50% ti tunggal maysa. Kabayatanna, 34% ti mangipangpangruna iti panagragragsak (fun), a dagiti lallaki (54%) ti ad-adda a mamati nga impportante daytoy ngem kadagiti babbai (45%).
Ti met napudno ken mararaem a biag ti prioridad ti 32% kadagiti Filipino a millennial, ket ad-adu dagiti babbai (52%) a mangipangruna ngem iti lallaki (48%).
Ti pananggun-od iti pannakaammo wenno paglaingan (skills) ket napateg para iti 24% kadagiti napagsaludsodan, a dagiti lallaki (51%o) ken babbai (49 porsiento) ti mangipakita iti dandani agpada a panaginteres. Ti panagbalin nga agwaywayas (independent) ket addaan ranggo a 18% (lallaki, 51%; babbai, 49%). Napateg met ti panagrang-ay kas propesional iti 10% kadagiti millenlial (lallaki, 55%; babbai, 45%).
Kababaan ti ranggo ti maipapan iti social justice ken traditions, nga uppat ken dua laeng a porsiento kadagiti napagsaludsodan ti mangibilang napateg dagitoy. Nangatngato a porsiento dagiti lallaki (56%) ti mangipangruna iti social justice no idilig kadagiti babbai (44%); idinto a ti maipanggep kadagiti tradision, 50% ti runggal sekso.
Ni Anna Mae Yu Lamentillo, Chief Impact Officer ti Arkipelago Analytics, ti nangipaay kadagiti insight kadagiti finding: “Pasingkedan daytoy a surbey a dagiti Filipino Millennial, suksukogenda manen dagiti tradisional a prioridad. Idinto nga agtalinaed a napateg dagiti relasion, mayun-una latta ti personal a balligi ken kinatalged. Mabalin a gubuayen daytoy a panagbalbaliw dagiti economic pressure, agbaliwbaliw a social expectations, ken ti panagtarigagay iti self-sufficiency.” (MANILA BULLETIN)
