Imbilin ni Sekretatio ti Department of Transportation (DOTr) Vince Dizon a maikkat dagiti tallo nga empleado ti Office of Transportation Security (OTS) a maipagarup a nairaman iti insidente ti “tanim-bala” iti Ninoy Aquino International Airport (NAIA) Terminal 3.
Kinuna ni Dizon ita nga aldaw, Marso 10, a naipilan ti kaso nga administratibo kadagiti tallo nga empleado bayat a maim-imbestigar dagitoy.
Idi Marso 6, nagreklamo ti maysa a pasahero a ni Ruth Adel, 69, nga "inikkan" dagiti security personnel ti NAIA iti bala ti bag-na idi dandanin ag-board daytoy iti eroplano a mapan iti Vietnam.
Segun ken ni Adel, imbaga dagiti security personnel nga adda x-ray image iti "babato" (bala ti paltog) iti uneg ti bagahena.
AFP, sisasagana a mangsuportar iti 3 a Filipino a naibalud iti China
Ngem idi naukag ti bag-na, awan met nakitada a bala.
Kalpasan daytoy, agkatkatawa a timmallikud lattan dagiti security personnel a dida man la dimmawat iti dispensar ken ni Adel gapu iti pannakataktakna iti biahena.
Iti sabali a bangir, binilin ni Dizon dagiti opisial ti OTS a repasuenda ti proseso dagiti screening ken security protocol iti eropuerto, ken mangikabilda iti hotline iti NAIA a mabalin nga awagan dagiti pasahero no adda parikutda iti eropuerto.
Dinagadagna ti publiko a dida agbuteng wenno agbain a mangipulong no adda kakastoy a mapasamak kadakuada. (Dexter Barro II/Manila Bulletin//Lito Hilidon/Bannawag)
