Kinuna ti Malakanyang a nakasaganan ti gobierno iti ania man a posible a mapasamak iti maipadamag a nangipaulogen ti International Criminal Court (ICC) iti warrant of arrest kontra ken ni dati a presidente Rodrigo Duterte.
Daytoy ti kinuna ni Sekretario ti Presidential Communications Office (PCO) Jay Ruiz idi Marso 9 kas sungbat kadagiti pattapatta a pimmanaw ti dati a presidente iti pagilian tapno liklikanna ti pannakaarestarna.
Inaklon ni Undersecretary ti PCO Claire Castro nga adda naawatda a damag maipapan iti arrest warrant ti ICC ngem saan a kinompirmar ti Malakanyang daytoy.
Impaganetget ni Castro a tumulong laeng ti Filipinas no agkiddaw iti tulong ti Interpol.
Inlawlawag ni Castro a no agpayso nga addan naipaulog nga arrest warrant, sumaruno a maipaulog ti hold departure order ken ni Duterte.
TRO kontra iti proseso ti Kamara iti impeachment ni VP Duterte, kiniddaw dagiti abogado
Ngem kinuna ti Office of the Solicitor General (OSG) nga awan pay naawatda a pakaammo manipud iti ICC mainaig iti arrest warrant para iti asino man a Filipino.
Iti sabali a bangir, naipadamag a napan iti Hong Kong ni Duterte idi Biernes tapno ikampaniana dagiti manokna a para senador.
Impaganetget ni Presidente Ferdinand Marcos Jr. nga awanen hurisdiksion ti ICC iti Filipinas kalpasan ti panaglusulos ti pagilian, ngem inlawlawag ti Malakanyang a makitinnulong laeng ti Filipinas no agkiddaw ti ICC iti tulong manipud iti Interpol. (Argyll Cyrus Geducos/Manila Bulletin//Lito Hilidon/Bannawag)
