Kinemmeg dagiti kameng ti Philippine Drug Enforcement Agency (PDEA) ti maysa a drug suspect ket nasamsam manipud kenkuana ti agbalor iti ₱3.57 a milion a mapapati a shabu ken maysa a kalibre .45 a paltog iti maysa a buy-bust operation a naisayangkat iti Siudad ti Urdaneta, Pangasinan ita a Marso 11.
Kinuna ni Joel Plaza, Direktor ti PDEA Region 1, a nakemmeg ti suspek a ni alias "Odi" kalpasan ti surveillance operation nga inwayat ti PDEA-Pangasinan Provincial Office (PDEA PANG PO) ken ti PNP Drug Enforcement Group-Special Operations Unit 1 (PDEG-SOU 1).
Naala manipud iti suspek ti agarup 525 a gramo ti mapapati a shabu a nailemmeng iti nagalutan a plastik, ken ti maysa a paltog.
Malaksid kadagitoy, naaalaan pay ti PDEA ti suspek iti magazine assembly, holster, pito a bala, uppat a selpon, sumagmamano a drug paraphernalia, lima a bundle ti di nausar a plastic sachet, brown sling bag, paper bag, brown envelope, asul a plastik, identification card, ₱2,000 a kuarta, ken ti buy-bust money.
AFP, sisasagana a mangsuportar iti 3 a Filipino a naibalud iti China
Naidarum ni "Odi" iti kaso a panaglabsing iti Section 5 (Sale of Dangerous Drugs), Section 12 (Possession of Drug Paraphernalia) ti Article II iti Republic Act (RA) 9165, wenno ti “Comprehensive Dangerous Drugs Act of 2002” ken iti RA 10591 wenno Comprehensive Law on Firearm and Ammunition. (Chito Chavez/Manila Bulletin//Lito Hilidon//Bannawag)
