Naipan iti kustodia ti Philippine National Police (PNP) ni dati a presidente Rodrigo Duterte ita nga aldaw, Marso 11, kalpasan a maiserbi kenkuana ti warrant of arrest nga impaulog ti International Criminal Court (ICC), babaen ti International Criminal Police Organization (Interpol), gapu iti crime against humanity, apaman a makasangpet iti Ninoy Aquino International Airport (NAIA) manipud Hong Kong.
Simmangpet ni Duterte a kaduana ti nabayagen a partner-na a ni Honeylet Avanceña ken dadduma pay a kameng ti pamiliana, agraman nasinged a kakaduana, iti NAIA Terminal 3 idi agarup 9:20 iti bigat. Nagluganda iti Cathay Pacific Flight CX907 ket sinabet ida dagiti kameng ti Criminal Investigation and Detection Group (CIDG).
Nainget a seguridad ti naipatungpal iti NAIA T3, ket personal a sinigurado ni hepe ti PNP General Rommel Francisco Marbil ti urnos ken talna iti eropuerto. Kaduana ni daulo ti CIDG Maj. Gen. Nicholas Torre III, dagiti kameng ti Interpol, ken ti Philippine Center on Transnational Crime (PCTC).
Iti maysa a video a nga impaskil ni Veronica, anak ni Duterte, kinuestionar ni Duterte ti pagbatayan ti pannakaidetenena iti PNP. Makita met iti video nga adda iti likudanna dagiti kameng ti Philippine Air Force (PAF).
AFP, sisasagana a mangsuportar iti 3 a Filipino a naibalud iti China
Saan a kinompirmar ti PAF no naipan ni Duterte iti PAF headquarters iti Villamor Airbase iti Siudad ti Pasay. Ngem kinuna ni Col. Ma. Consuelo Castillo, pannakangiwat ti PAF, a kadawyan laeng a mausar ti pasilidad ti PAF iti isasangpet wenno ipapanaw a kasapulan ti panagbiahe iti tangatang.
Im-imbestigaren ti ICC ni Duterte gapu iti drug war nga insayangkatna idi isuna ti presidente. Segun kadagiti human rights group, pinullo a ribu a tattao ti nagbalin a biktima ti extra-judicial killing a nainaig iti drug war ni Duterte. (Martin Sadongdong/Manila Bulletin//Lito Hilidon/Bannawag)
