Tiniliw dagiti pannakabagi ti International Criminal Court (ICC) ken ti Interpol Manila ni dati a presidente Rodrigo Duterte iti isasangpetna itay 9:20 AM ita nga aldaw, Marso 11, iti Manila manipud iti Hong Kong.
Adda pay laeng iti uneg ti naglugananna nga eroplano (Cathay Pacific CX 907) idi inserbi ti mismo a Prosecutor General ti ICC notification para iti arrest warrant iti dati a presidente para iti crime against humanity a mainaig iti inwayat ti administrasionna a drug war a mapapati a nakapapatayan ti umabot iti 30,000 a tattao.
Segun iti statement ti Presidential Communication Office, naawat ti Interpol Manila itay laeng parbangon ti opisial a kopia ti warrant of arrest manipud iti ICC.
Addan iti kustodia dagiti autoridad ni Duterte. (BANNAWAG News Team)
