Impasardeng ti Office of the Ombudsman (OMB) ti ania man nga addang iti kaso a maibusor ken ni House Speaker Martin Romualdez ken tallo pay a diputado gapu iti maipagarup a pannakairamanda kadagiti naipadamag nga illegal a naipalaon iti 2025 national budget.
Idi Pebrero 10, impila da James Patrick Romero Bondoc, Ferdinand S. Topacio, Diputado Pantaleon Alvarez, Diego L. Magpantay, ken dati a heneral Virgilio R. Garcia ti kaso a graft ken falsification a maibusor kada Romualdez kdp. mainaig iti 2025 General Appropriations Act (GAA).
Idi Pebrero 19, kiniddawda a maipakat koma ti preventive suspension kadagiti respondent agingga a maresolbar ti impilada a kaso.
Iti maysa a resolusion idi Marso 7, kinuna ni Ombudsman Samuel R. Martires nga awan pay ti naidatag nga impormasion (criminal charge sheet) maibusor ken ni Romualdez ken dagiti dadduma pay a diputado, isu a saan a maipakat ti mandatory suspension (pendente lite) maibatay iti Section 13 ti Republic Act No. 3019.
AFP, sisasagana a mangsuportar iti 3 a Filipino a naibalud iti China
Nagkedked ni Martires a mangtaming iti kaso nga impila da Alvarez ta addaan daytoy iti pakainaigan iti petition for certiorari and prohibition nga impila ni Rodriguez iti Korte Suprema (SC) a nangkuestionar iti konstitusionalidad ti 2025 GAA.
Inlawlawag ni Martires a masapul a risuten pay nga umuna ti Kangatuan a Pangukoman ti konstitusionalidad ti 2025 GAA sakbay a tamingen ti Ombudsman ti kaso a kriminal a naipila.
Impaganetget ni Martires nga awan ti karbengan ti Office of the Ombudsman a mangipatay iti dusa wenno pannakasuspenso kadagiti impeachable official kas kadagiti kameng ti Kongreso ken Hudikatura, segun iti Section 16(3), Article VI ti 1987 Constitution. (Czarina Nicole Ong Ki/Manila Bulletin//Lito Hilidon/Bannawag)
