Inngato ti Philippine National Police (PNP) ti alert status iti pagilian gapu iti mabalin a maiwayat a protesta dagiti mangsupsuportar ken dati a presidente Rodrigo Duterte kalpasan ti pannakaarestar ken pannakaibiahe daytoy iti The Hague, Netherlands mainaig iti kasona a crime against humanity.
Naipangato daytoy idi Martes, Marso 11 kabayatan nga isagsagana pay laeng dagiti autoridad ti pannakaibiahe ti dati a presidente. Iti kaaddana iti Villamor Airbase, nagtitipon dagiti mangsupsuporta ken ni Duterte iti sango ti Gate 1 ti airbase iti Siudad ti Pasay. Nagruruar ken nagtitipon pay dagiti tattao iti Siudad ti Davao idi maibiahen ti dati a presiente iti alas onse ti rabii idi Marso 11.
Naipaulog ti memorandum kadagiti amin a Police Regional Offices (PRO) ken National Support Units (NSU) a pakairamanan ti Special Action Force (SAF).
Naibilin kadagiti amin a pananakabagi ti linteg nga iwayatda ti panangsaluadda iti seguridad ken nainget a panagridam para iti posible a maparnuay a riribuk.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Naibalakad kadagiti police commander nga ipasdekda ti control point kadagiti pagbedngan ken isaganada dagiti civil disturbance management contingent tapno masigurado ti kinatalna ken kinaurnos, agraman kinatalged ti publiko.
Naipaulog ti memorandum ti PNP kalpasan nga inawagan ni Harry Roque, dati a pannakangiwat ni Duterte a mapapati nga aglemlemmeng ken awan iti pagilian, dagiti pasurot ni Duterte nga aguummong ken agtignayda maibusor iti kunana nga illegal a pannakarestar ti dati a presidente. (Aaron Recuenco/Manila Bulletin//Lito Hilidon/Bannawag)
