Kinuna ni Senador Imee Marcos idi Martes, Marso 11, a naklaat ken kasla dina patien idi maammuanna ti pannakaarestar ni dati a Presidente Rodrigo Duterte gapu iti krimen kontra iti sangkatawan.
Iti maysa nga interbiu, kinunana a maasian ken ni Duterte ken dinakamatna pay ti amana, ti pimmusay a dati a presidente a ni Ferdinand Marcos Sr., ken dagiti dati a presidente a da Joseph Estrada ken Gloria Macapagal-Arroyo.
"Naasianak ken tatangko idi 1986. Maasianak met kadagiti nagsasaruno a presidente, kada Erap ken GMA. Riribuk laeng ti inyeg daytoy. Awan man la nasursurotayo," kinuna ti senadora.
Segun kenkuana, awan ti pagimbagan ti maulit-ulit a siklo ti panagsusupiat iti politika iti pagilian ken kadagiti umili.
16 nga OFW a nagrali iti Qatar, mabalin a maibalud iti 3 a tawen
"Simmayaat kadi ti panagbiagtayo gapu iti pinnolitika? Rimmang-ay kadi ti pagiliantayo? Kadagiti nakababain a pagteng iti politikatayo a nanapno iti binnales, panaglalaban, rimmang-aytayo kadi? Napnektayo kadi? Nasarakan kadi ti publiko ti ragsak?" kinunana.
"Naklaatak... Maasianak a talaga kenkuana. Lakay isunan, di kadi? Kas iti tatangko, ania ti napasamak? Kasta met laeng. Nakalkaldaang," innayonna. (Dhel Nazario/MB)
