Sinungbatan ni House Deputy Majority Leader ken La Union 1st district Rep. Paolo Ortega V ti imbaga ni Bise Presidente Sara Duterte a maysa a "naipanurok a panangbarengbareng" soberania ti Filipinas ti panangarestar ti International Criminal Court (ICC) ken International Police (Interpol) iti amana a ni dati a presidente Rodrigo Duterte.
Segun ken ni Ortega, ti imbatad ni BP Duterte ti "perpekto" a reaksion maipanggep iti isyu ti panagbasakbasak dagiti Chinese iti West Philippine Sea (WPS).
"Nasayaat siguro nga i-copy-paste ti statement-na iti isyu ti (WPS)," kinunana iti maysa a press conference ita a Mierkoles, Marso 12.
Mabalin a kkunaen a sarkastiko ti kinunana ni Ortega gapu ta immunan a nababalaw ni Bise Presidente Duterte gapu iti kinaulimek daytoy iti isyu ti panang-bully ken agresion dagiti Chinese iti WPS.
Saan a nakidnap, awan nalabsing iti pannakaarestar ni Duterte - Malakanyang
Pagaammo a ti tatang ti bise presidente ket mangpabpabor iti China nangruna iti pakaseknan ti WPS.
Idi Martes, Marso 11, inarestar ti Interpol ti natataeng a Duterte mainaig iti kasona a crime against humanity.
Kinondenar ri bise presidente ti pannakaarestar ti amana ket kinunana a "naipanurok a panangbarengbareng daytoy iti soberaniatayo ken pananginsulto iti tunggal Filipino a mamati iti panagwaywayas ti pagiliantayo." (Ellson Quismorio/MB)
